سبحان علام الخفا

سبحان علام الخفا

.
.
.

الشمس وقت غروبها ما بها حيل
مالت مثل جفنٍ يغالب نعاسه

غابت وطاحت دونها ستارة الليل
والصبح يخلع فوق أمسه لباسه

وخلت مكان للثريا ولسهيل
ونجوم في الظلمة دليل وحراسه

قفّت وصحت في الحناجر مواويل
حطاب شعر وشوفة البدر فاسه

نارٍ تشب ودله تفوح بالهيل
من شمّها يختال ويميل راسه

أو عاشقٍ يطوي الزمن بالتعاليل
إن قام حظه عاجله بانتكاسه

أو شايب تعطر مساه التراتيل
والذكر يرفع بين ذا الناس ناسه

أو شايلٍ هم الحمول المثاقيل
دينه وفقره بين صبره وياسه

أو شاكي لله من الظلم والويل
والشر لو تدري ترى الظلم ساسه

فغروب شمس الكون حكمه وتمثيل
لغروب شمس العمر هذا قياسه

لحظات نخسرها على كل تأجيل
وما هي بتحتاج الذكا والفراسه

ناظرتها وايامنا في المدى خيل
تركض يباريها الكدر والوناسه

والعسر في الدنيا وفيها التساهيل
وبه للسعه كاسٍ وللضيق كاسه

سبحان علام الخفا والمقابيل
سبحان من فوق المخاليق باسه

وسبحان ربي عد ما حدّر السيل
وعداد ما طاب الجنا والغراسه
.
.
#شعر
سلطان آل منيف
.
.

المصدر: الملتقى الجماهيري للشاعر محمد بن فطيس المري