@ قصيدة الصـوت والصــدى @ للشاعر ذيب الشمري والشاعرة ام خليفة المطيري

@ قصيدة الصـوت والصــدى @ للشاعر ذيب الشمري والشاعرة ام خليفة المطيري

السلام عليكم ورحمة الله وبركاته أخوتي وأخواتي في الله يسعدني بل

يشرفني بأن أكون أول المشاركين بهذا القسم لهذه الردية الجميلة

( قصيدة الصوت والصدى ) للشاعرة ام خليفة المطيري والشاعر ذيب الشمري

الشاعر المعروف صاحب القلطات والمحاورات الرائعة وأنني أعلم بأن

كثير منكم قد مرت عليه الأبيات والبعض الأخر منكم لم تمر عليه ولم يقرأها

لذا ها هي بين أيديكم تطرح وكلي أمل ان تجدوا الجزالة الرائعة من بين شطورها

وقبل طرح الأبيات يسرني توضيح السبب من طرحها فالسبب يعود

ان الشاعرة ( ام خليفة المطيري ) لديها ابن أسمه مشعل يحب الشعر

ومعجب بالشاعر المحاورة المعروف ذيب الشمري فكان يرتاد عليه ويزوره كثير

ويلتقي بالشعراء عنده ويتداولون الشعر ويناقشونه سواء نقد ام استحسان وغيره

فكان مشعل كل ما يرجع من عند ذيب الشمري يجلس مع والدته ( الشاعرة ام خليفة )

ويقول لها كنت عند ذيب وذيب يقول كذا ويحاور كذا وهو اجزلهم وأفضلهم

ويذكر اسم ذيب الشمري كثير وشاءت الأقدار ان يتوفى مشعل بأثر بندق أو شوزن

بطريق الخطأ وأردته قتيل ومن يومها والعجوز تبكي عليه ولم تنساه وفي يوم

كانت طالعة مع ابنها الآخر طلال وأوقفتهم الأشارة الضوئية وكان من ضمن الواقفين

الشاعر ذيب الشمري ولما شافه ابنها طلال قال لوالدته : هل تعرفين من هذا الرجل ؟

فقالت له : لا

فقال لها : هذا الشاعر ذيب الشمري فرجعت الذاكرة بالعجوز لأيام مشعل وأيامه مع

الشاعر ذيب الشمري ولما عادت للبيت أرسلت هذه الأبيات للشاعر ذيب الشمري

أترككم مع القصيدة ( قصيدة الصوت والصدى )

أولاً مع قصيدة الصوت لأم مشعل الشاعرة ( ام خليفة المطيري )

ياذيب ياذيب الرياجيل ياذيـب
يلي بعيد الدار واللــي هنيـّه
يا ذيب انا بنشدك ماشفت لي ذيب؟
ذيبٍ نصحته عن طريقـه وعيـّه
ذيبٍ يرد حوض المنايا ليا هيـب
وطلعه مثل طلع القمـر والثريـّه
يالشمري ياذيـب يامنبـع الطيـب
ذيبي خذاه المـوت ماهـو بحيـّه
وانا بكيته لين راسي غـدا شيـب
وصبرت صبر ايوب غصبٍ عليّه
طرى علي في يوم شفتك على جيب
يمدحك مدح بزود ماهـو شويـّه
كانك عرفت شعيل مابه عذاريـب
غير الشجاعـه والكـرم والحميّـه
يالله وانا طالبـك ياعالـم الغيـب
لاتوفـق اللـي باعـه البندقـيـّه

ثانياً قصيدة الصدى برد الشاعر ( ذيب الشمري )

يا ناشدتني عن شطير المخاليب
اللي سرى في ليلــةٍ خرمسيه
عليه انـا مثلك جروحي معاطيب
وانتي تزيدين الجروح الخفيّــه
والذكريات اللي تشــب اللواهيب
لو ما طلبناها تجينا هديـــــه
اقـدّر اصحاب القلـوب المصاويب
لو يحذفونـــي بالجحيم اللظيـه
مكتوب جاني غيــر كل المكاتيب
مشاعـرٍ من عاقلـــه واجوديه
بنت الرجـــال مكملين المواجيب
اهل المفاخر طيبيــــن السجيّه
جاني سؤالٍ عذّب الــروح تعذيب
اشـــد من ضرب السياط القويه
واشد من ضرب السيوف المحاديب
وامسيت مستسلم ورافع يديّـــه
اشعيل اعرفه دون شـكٍ ولا ريب
بالمعرفه ماهو غريـــب الهويه
لو هو صغيـر ولا مظاله تجاريب
بالطيب دايــــم عالي المعنويه
اطوْل عمار من البشر نوح وشعيب
كلٍ بيومه واجهتــــــه المنيّه
ولو كانت الدعـوى فزوع ومطاليب
بين البشر ما نعتبرها قضيّــــه
في لازمك تمشــي طوال الاشانيب
ما يرجعون الا عليهــــم رضيّه
ولو البكا والنـــوح وتشقق الجيب
يردلك نور العيــــــون الشقيه
ارسل لك صفوف البنــات الرعابيب
جميع وحده تدعّــي شمريـــــه
يبكـــــن ويلبسن الثياب الغرابيب
في لازمــك مثل النحــل بالخليــه
لاشك ما تنفع جميــــــع الاساليب
ادعي عســـــى الرحمن رب البريه
يجعل له الحـور الكواعب معازيـــب
بين الحدايق والقصــــــور البهية
في جنـــــةٍ يصفى بها البال ويطيب
ويجمعكم الله بالنهايــــــه سويــه

اللهم آآآمين يا شاعرنا ذيب وأسأل الله جلا في علاه

ان يصبر قلب العجوز بوفاة ابنها ويجعل سكنه الفردوس الأعلى

ان شاء الله ويرحمه رحمة واسعة هو وسائر موتى المسلمين ..

اللهم آآآمين يا رب العالمين

إلى هنا تنتهي قصيدة ( الصوت والصدى ) ..

وكلي امل بأن كنتم فعلاً في موعد مع الجزالة من خلالها

تقبلوا خالص شكري وتقديري

أختكم في الله حروف من نور ..

المصدر: الملتقى الجماهيري للشاعر محمد بن فطيس المري

راقت لي اختي حروف من نور من زمان عن هالمعلقات


تحيه معطره

اهلين ... حروف من نور،،
بداية جميلة ... واطلاله أولى تستحق التقييم،،
نتشرف بوجودكم اول المساهمين في هذا القسم،،،
موضوع يستحق الثناء والشكر...
جميلة تلك الأبيات ...
وجميلة تلك القصص ....
صوت وصدى .. من أروع ما يكون،،،
لك تحيااتي وتقديري وتقييمي،،

جزاله ماعليها كلام وبيض الله وجهك يابنت الاجواد

الله يصح السنتهم جميع ويرحم مشعل ويرحم اموات المسلمين جميعا ومشكوره يأختي حروف من نور على الطرح الرائع
ودي وتقديري

عجز لسآني عن آلتعبير ..
آبدآع لآيوصف .. !
صح لسآنهآ ولسآن آلشمريَ ..
وآلله يرحم ولدهآ ..