قصيدة معلقة مدح القبائل للشاعر يوسف بن فليح الرشيدي

قصيدة معلقة مدح القبائل للشاعر يوسف بن فليح الرشيدي

امتدح الشاعر/ يوسف بن فليّح الشطنان الرشيدي

بمعلقته الشعرية المتكونة من مائة وثلاثون بيتً في قبائل الجزيرةالعربية
بصفاتهم وتاريخهم .

ورغم صغر سنه أستطاع هذا الشاعر أن يكتب هذه المعلقة ذات الجزالة والقوة الشعرية بفترة وجيزة

ويمتلك الشاعر مخزوناً تاريخيا ً بقبائل الجزيرة العربية الذي اكتسب هذا المخزون التاريخي والشعري

من والده الشيخ فليح بن مطلق الشطنان أطال الله في عمره وهو من بيت شعري وتاريخي .

بسم الله الرحمن مبدا كلامي = الخالق المعبود منشي الغمامي

المعطي اللي يطلبه ما يضامي= امدبرَّ الأفلاك من حالٍ لحال


ومن بعد ذكره سقت قاف الشعرسوق= شاعر واغني كل معنى وطاروق


ويالله طلبتك عن رداء كل مطفوق= والله يجازينا على حسن الأعمال


والله يحفظ المملكة ويحماها= في ظل حكامٍ بعيدٍ مداها


آل السعود وكلنا في ذراها= حكامنا لا صك جالٍ على جال


وسجلت من بحر القوافي قصيدة= لجل القبايل جت بيوتٍ عديدة



وجبت المعاني من بيوتٍ فريدة= من شاعرٍ للشعر ناقض وفتاَّل



ربعي سلايل عبس والراس طايل = بني رشيد مطوعّة كل عايل


يوم القبايل بين صايل وجايل = وسامة الكفه لو إن الزمن طال



وكم دولةٍ سجلبها اسم الرشيدي = الكل منهم فالشدايد عضيدي



ربعي هالطالات سقم العنيدي = افخر بربعي في قصيرات وطوال



وسبع البيارق سجلت بالتواريخ= عنوانها فرسان عبس المطانيخ



يوم المغازي وذبحة الشيخ للشيخ = خيالنا يسواله الفين خياَّل



وساس الكرم في ربعنا شيء مذكور= ودخيلنا يامن من الشروالجور



وخوينا ما يشكي الهم مسرور= معزته تبقى ولو كان رحاَّل



وأبذكر العجمان قوم السلاطين= لا ثارت الهيه سعوط المجانين



افعالهم تثبت بفعل وبراهين= ومن فعلهم دم الرجاجيل شلال



وعتيبه الهيلا طويلين الأشبار = ذباحة الحايل وحماية الجار



بأفعالهم دايم يدوسون الاخطار= ويوم الشدايد ثابتة كنها اجبال



وقحطان قوم العز من ماض الأزمان= أصل العرب والنعم لا قيل قحطان



وأفعالهم يشهد لها الإنس والجان= وخيالهم يعرف على كل مشوال



ويام العريقة عز والله قبيلة = من نسل همدان العموق الأصيلة



أهل المراجل والفعول الجزيلة= ودايم على الشدة زحازيح ورجال



وجينا الظفير متَّعبين الركايب = أهل البويت اللي تفك النشايب



والجود ساس مطوعين الصعايب = وعدوهم من فعلهم شاف الأهوال



وقوم عنزة قوم المهلهل وجساس= لا جاء نهارٍ فيه للحرب مقباس



اللي لهم بالمجد مبنى على ساس = وفعولهم دايم سمينات وجزال



وذكرت شمر من طنايا وسناعيس= اهل الكرم والجود وأهل النواميس



سقم المعادي للحرايب مقابيس= هذه فعايلهم بلا شك وجدال



ومطير قوم المعجزات الثلاثة= حمر النواظر طيبهم بالوراثة



تاريخ بالماضي وعصر الحداثة = هذي وصوف مطير تذكر بالأمثال



وجينا الحروب أهل الوفا والجمالة = قبيلة أهل الطيب وأهل الشكالة



والكل منهم وافياتٍ خصاله= لاعودت في حل عسرات الأقفال



وسبيع والله محتمين التوالي = أهل الفعايل والسيوف الصقالي



مدلهين الضيف روس الرجالي= قومٍ تعز الطيب من كل مدخال



وأذكر بني مرة ّ هالشعر والخيل= كسابة النوماس جيلٍ بعد جيل



والنعم بالمرة زحول الرجاجيل= اللابة اللي ما مشت درب الأنذال



وأذكر بني خالد هالطيب والجود=أهل السموت وصيتهم ماله حدود


كبار البيوت مطوعَّة كل مقرود=لاجاء نهارٍ للمعارك به قتال


وجينا السهول وكل فخر تطوله= أهل المبادي الطيبة والرجولة


اللي لهم بالحرب صولة وجولة= هذا كلام الصدق ماني بزلال



وأذكر شرارات الشمال المداغيش= قوم اللحاوي قوم حماية الجيش



وابن دعيجا شيخ يروي المعاطيش= والنعم والله يا كريمين الأسبال



وأذكر بني هاجر طويلين الأبواع= مطوعين اللي على الحق ما طاع



قبيلةٍ بالفعل شجعان واسباع = مسيلين اللي من الدم ما سال



وبني عطا أهل الوفا والمواجيب= قوم العوازم قوم حل المصاعيب



مثل السحاب المعتلي بالمراقيب= والكل منهم للصعيبات حلاَّل



وأبذكر الأشراف في كل ديرة= أهل الشرف وأهل السيوف الشطيرة



من نسل هاشم والسلاله شهيرة = ورسولنا جانا على الحق مرسال



وقريش قوم المصطفى والصحابة= والكل منهم دوم يحسب حسابه



قبيلةٍ للطيب عز ومهابة = اللي لهم في منزل الطيب منزال



وجينا الداوسر حافظين الوداعة = خطلان الأيدي بالكرم والشجاعة



واللي طويل ذراع تكسر ذراعه= لا جاء نهارٍ فيه صولات الأبطال



وبني تميم اللي على كل قمة= على المسيح الأعور أشد الأمَّة



قول الرسول المصطفى والأئمة = وتميم للعدوان همٍ وغربال



وبلي هالميقاف وأهل الشهامة = وقت اللقا كلن وكارب حزامة



واللي يعاديهم يذوق الندامة= فعايلن تبقى لتالين الأجيال


وجهينة الفرسان يوم الطرادي= اللابة اللي يكعمون المعادي



والعلم لجهينة ثبات وكادي = ودايم على الشدة مشاكيل وعيال



وقلت الحويطي والحويطات يوفون = كسابه النوماس بالطيب يطرون



اللي نهار الكون للموت يردون= وفعل النشاما صايرٍ مضرب أمثال



وبني عطيه مخلفين الهقاوي= مطوعين اللي على الشر ناوي



وعدوهم يشكي كثير البلاوي= ومكيالهم غطى على كل مكيال



ورجال زعب اللي لهم كل هيبة = فكاكة الحيزا نهار الغصيبة



ويوم الشدايد ما رضوا بالغليبة = والكل منهم للثقيلات شياَّل



وأبذكر هذيل الفخر والبطولات = أهل الحكم لاسطروا قاف الأبيات



وأفعالهم ترسي بكل المهمات= وقولن بليا أثبات تزوير واهبال



وسليم مجدٍ من سنينٍ قديمة = حماية الساقة بفعل وعزيمة



واللي يعاديهم يشوف الهزيمة= تاريخهم ثابت مع الوقت لا زال



وبني كثير أعدهم والمغيرة= اسيوفهم يوم الملاقا شطيرة



وعدوهم عايش بهم ٍ وحيرة= سقم الخصيم اللي عن الحق مياَّل



وجينا الفضول اللي لهم بالوفا بيت = اللي لهم بالعز طيبٍ على صيت



افعالهم تثبت بكل التواقيت = وبيوتهم دام على العز مدهال



وعدوان يكفيهم نمر بالمغازي= قبيلةٍ مثل الجبل ما تهازي



قمة جبل تكشف لكل النوازي = افعالهم تثبت بروحات واقبال



وبني صخر للمجد ساس وركيزة= اللي لهم بالطيب مذهب وميزة



ونعم والله يالرجال العزيزة= أهل السطر وقت الشدايد والأفعال



وأكن للسرحان كل احتراما = قلايد الخيل الرجال النشاما



واللي يعيش بقربهم مايضاما = في وقتنا الماضي وفي وقتنا الحال



وأكلب جبالٍ فالملاقا رفيعة= حماية القالة حصونٍ منيعة



وعدوهم يشكي العنا والقطيعة= وما حسبوا يوم المواقف للأموال



وثقيف تاريخٍ مدَّون ومعروف= وعدوهم قبل اللقايشكي الخوف



هم ساس للفصحى ونقطة على حروف= حتى من الفصحى يغنون موال



وجينا البقوم أهل الكرم والعطايا= ظهور السواني بالجزيرة نقايا



ونعم والله ياسهوم المنايا= قبيلة أهل الطيب في كل الأحوال



وأذكر بني زيد بقصيدي ومعناة= أهل الظفر وأهل البيوت المبنّاة



منهم مشايخ دين للحق وقضاة = والدين يبقى والشريعة لها ظلال



وباهله قوم الرجال المناعير= منهم قتيبة قايدٍ للطوابير



تاريخهم ثابت مسجل بأساطير= معربين الجد والعم والخال



وبلحارث الشجعان في كل غارة= لاصار زند الشر يقدح شرارة



وحرابهم لازم تجيه الخسارة = لا جاء نهارٍ تثبت أفعال وأقوال


وبني شهر يوم الصعيبات شجعان= ميزانهم يرجح على كل ميزان



وافعالهم بالترك ما قف وعنوان= مزلزلين الترك بالفعل زلزال



وبني عمرو ياللي تهقويت أحذرك= قبيلة خشم العدو تفركه فرك



والمطلا ضلع وشاهد لذبحة الترك = تاريخهم ثابت لو إن الدهر مال



والاحمري والاسمري عز للضيف= اللي لهم في مرقب المجد تشريف



تاريخهم واضح ولاهو بتزييف= وعدوهم مغروس في عينه خلال



وشهران نعم اللابه الصيرمية= أهل السطر وأهل الكرم والحمية



وعزومهم يوم الشدايد قوية= وأفعالهم تكشف خفا كل محتال



وأذكر بني غامد عريبين الأنساب= اللي بوقت الضيق يحسب لها حساب



لا وقفت ما بين طالب وطلاب= اللابه اللي طوَّعت كل عياَّل



وزهران لا من صار غالب ومغلوب= حرابهم دايم مع الوقت مرعوب



تاريخهم ثابت وباقي ومكتوب= وعدوهم من فعلهم دوم يهتال



وشمران ابذكرهم رجاجيل وحشام= متوارثين الطيب عامٍ بعد عام



وتبقى فعايلهم على طول الأيام = ويشهد لها التاريخ في كل منوالٍ



وبلقرن يوم الفعل شجعان وقروم= وحرابهم من لذة النوم محروم



ورجالهم يوم المهمات زيزوم= اللابة اللي فعلها يطرب البال



وعسير من يجهل فعول العسيري= والكل منهم سيف حدة شطيري



وتاريخهم معروف علمه كبيري= قلت الصحيح اللي فلا يوم ينزال



وأذكر بني مالك بقولي ولا زِيد= أهل الوفا والعرف وأهل البواريد



اللي لحوض الموت دايم مواريد= هذا الصحيح وكلمة الحق تنقال



ونهد وفهم راسين طول الزماني = أهل الفعول امعربين المجاني



وأدهم وصيعر مثبتين المعاني= فكاكة الاشكال بالجاه والمال



وفعل المناصير أذكره يحمل امجاد= اللي مواقفهم على روس الأشهاد



وأبذكر المنهال بالطيب رواد= والنعم والله يا صناديد منهال



وأذكر بعد جيزان ورجال فيفا= اللي ترحب كل ما حل ضيفا



والكل منهم فالمواقيف سيفا= والكل منهم باللقا طيب الفال



وذكرت في قافي جميع القبايل = تاريخهم ثابت بفعل ودلايل



والشك ما بين الرجاجيل زايل= والمعذرة للي نسيته بالأمثال



وانا ولد عودٍ على العز ممشاه = من نسل شطنان الرجال المسمّاة



أهل المراجل والسيوف المحنّاة= زبن الدخيل مطوعّة كل من عال



وعندي طلب واحد لكل المخاليق= أدعوا لساس الطيب في ساعة الضيق



مرزوق نسل رشيد نسل المطاليق= أدعو له برحمة وفي خير منزال



بخمسة عشر من شهر خمسة فقدناه= يوم الثلاثاء حالفٍ يوم منساه



يالله يا ربي عسى الخلد مثواه = الصاحب اللي ما يعوّض برجال



عرش الوفا والطيب والجاه والعز= وعرش المراجل عقب فرقاة مهتَّز



الصاحب اللي فز للمرجلة فز = ما ساق لجل النعم دينار وريال



مية وثلاثين البيوت امعدودة = من شاعرٍ بالشعر مثبت وجودة



وصلاة ربي عد مرزم رعودة= على النبي الهاشمي خير من قال




الشاعر / يوسف فليح الشطنان الرشيدي

منقول

المصدر: الملتقى الجماهيري للشاعر محمد بن فطيس المري

ونعم بكل القبآئل يعطيك العاافيه على القصيده الرآئعه

ماشاء الله
صح لسآنه يوسف
ونعم والله بكل القبآيل

تسلم افلاطون عالنقل ماقصرت الله يحفظك

اقتباس المشاركة الأصلية كتبت بواسطة لـجـل آلــوعــد ونعم بكل القبآئل يعطيك العاافيه على القصيده الرآئعه

اشكرك لجل الوعد على مرورك الكريم

اقتباس المشاركة الأصلية كتبت بواسطة الماسـه ماشاء الله صح لسآنه يوسف ونعم والله بكل القبآيل تسلم افلاطون عالنقل ماقصرت الله يحفظك

اشكرك الماسة على كلامك الطيب ومرورك الكريم

صح لسان الشاعر على هذه المعلقه

وصح نقلك واختيارك

كل القبايل تستاهل المدح

لاهنت ياافلاطون

صح لساان شااعرهااا وتسلم ع النقل المميز .. لك ودي ..

اقتباس المشاركة الأصلية كتبت بواسطة قـاصد كـريم صح لسان الشاعر على هذه المعلقه وصح نقلك واختيارك كل القبايل تستاهل المدح لاهنت ياافلاطون

الله لايهينك اخي قاصد كريم على مرورك الذي شرف صفحتي

اقتباس المشاركة الأصلية كتبت بواسطة غراااام نجد صح لساان شااعرهااا وتسلم ع النقل المميز .. لك ودي ..

اشكرك غرام نجد على مرورك الكريم

صح لسان قايلها وشكرالك على النقل الجميل
قصيده جزله
وكل القبايل تستاهل
ربي يحفظك معلقه جزله
تقبل مروري وتقيمي