اللي نكب لبنان وليد جبلاط

اللي نكب لبنان وليد جبلاط

صحيفة الجزيره

هنا مساجلة جميلة بدأها الشاعر الكبير رشيد الزلامي موجها اياها للشاعر عبدالرحمن بن بديع ومدخلا عدة شعراء فيها و لم تلبث حتى اصبحت متداخلة الاطراف حيث شارك بها غيرهما الشاعر سلطان الهاجري والشاعر محمد بن الذيب والشاعر مانع بن شلحاط وقد بداها الزلامي قائلا:

يابن بديَع وقفت بي على الشاط

الموج عالي والسباحه مخيفه

تعبت ماباقي من الجهد قيراط

دفيتها لين ابركت في النصيفه

في رحلةِ مابين تموز وشباط

عنوانها واضح بصدر الصحيفه

راحت سدى باسباب تفريط وافراط

واستنزفت دم القلوب النظيفه

لوكنت من شيد حضارات الانباط

فوق الجبال الشامخات المنيفه

ولو كنت بالحكمه منافس لسقراط

باح الكلام , وصدرتبي امعيفه

طال الزمان وجرح الايام ماخاط

ينزف وعيا لايوقف نزيفه

فقدت وقفات السدارى هل الغاط

اهل المواقف والنوايا الشريفه

الياطرى لي شخص ابوزيد , تنساط

كبدي وقلبي مايهود رجيفه

وقدام يدخل خاطري ياس واحباط

او يقتحمني سيل وادي حنيفه

افزع وناد الهاجري وابن شلحاط.

ومدغم وابن قضعان وايضا ابن ريفه

ولابد لك بمحمد الذيب تحتاط

يكفيك عن عنتر ورمحه وسيفه

انا بذلت الجهد في كل الاوساط

لكن دنيا خاتمتها ضعيفه

ماتصفي الا مع منافق وخراط

ومعوقِ باقي لجده خليفه

رزقه حرام ولايجي غير نقاط

وغير النذاله مالقى له وظيفه

يجعل يلقطهم من القاع لقاط

ومن الغضب تنزل عليهم قذيفه

تضرب جماجم روسهم ضرب مخباط

لين الوليف يقوم يلعن وليفه

- فاجابه عبدالرحمن بن بديع

معا بداية شعري وشاربي خاط

من قالي الشعر، ويش اتعريفه؟

قلت الزلامي ماخذِ كل الانواط

حسان الأول، والزلامي وصيفه

صفت له ابيوت الشعر صف ضباط

وتاتي قوافييه على كيف كيفه

لو كان شطر عشرة احروف وانقاط

مثل المخيل اللي غزير قنيفه

سندت للغطغط وحدرت لرهاط

ويانعم بالشاعر ونعمِ بقيفه

اللي لهم في غبة الحرب مقلاط

على الرمك وملاعبات السفيفه

والحين ياللي شعركم غنج واهياط

وين الحرير القرمزي والقطيفه

اليوم صارت ريحته ريحة اشياط

دام اجتمع مشهاب نارِ وليفه

قصيدكم على ملفات واشناط

بس الوكاد انه قصيدِ نعيفه

لو تدخلون القدس من باب الاسباط

حياتكم فيها حياةِ كسيفه

واللي نكب لبنان وليد جبلاط

والمشكله حزب السياسة حليفه

يا بو جميل، العلم من دون فقاط

ما تعرف اهل العزم حاجه كليفه

ابشر بنا حنا قويين وانشاط

حتى ولو ان المزاهب خفيفه

ولا نقول ابنسبق الريح ببساط

ولا بنطلق شوف عينِ كفيفه

والآدمي وان عاش حياته انماط

فيها الليال الهينه والعنيفه

اللي ما دامت لاهل بابل والاسباط

قد قالها النعمان ابو حنيفه

ومن دون ذي الخلصه ومن ذاتا انواط

الله جعل للناس كعبه شريفه

ذكر نبي الله للساعه اشراط

وفي هالزمن قد بان منها نصيفه

والكل يخشى يالزلامي، ويحتاط

والله يغفر.. عند نشر الصحيفة

وهذا رد الشاعر- محمد ابن الذيب

الجمر حامي غير مافيه ملقاط

لكن ننوشه باليدين ونحيفه

ولكل شوط سابقه ياهل الاشواط

وانا معا رشيد ماني رديفه

لاتجذبك شرد القوافي وتشتاط

وانته رشيد اللي علومك طريفه

كانك على اهل الشعر بتعد الاغلاط

مانته بناعم في الحياه المريفه

من الوطوايط ابيبلشك وطواط

جناحه اطول وجنوبه رهيفه

ويولع البرميل من عود مشخاط

لوكان عيدان المشاخط نحيفه

انعرف ابو واطين وانعرف ابو واط

وانارة الثاني تراها ضعيفه

مانته مثل موسى لكن حن لك اسباط

وانفوسنا لمناوشاتك عجيفه

وبغداد لازالت اذا جاز الاسقاط

تقول هارون الرشيد الخليفه

والثانيه يالغاط واللي ورى الغاط

رشيد نياته تراها نظيفه

ليتك تشرط يالعتيبي تشراط

وانا لعسرات الامور الكليفه

امن الذهب لو ما امتلك غير قيراط

بيني وبينك قسمته بالنصيفه

فرقتي قدر ومحبه ومسفاط

فرق السهل عن الجبال المنيفه

وشعر اللحى ماهو مثل شعرة الباط

الثانيه وسخه والاولى نظيفه

ولاني بحب امغط العلم مغاط

رديتها جزله ولاهي كسيفه

وطرشت لك فكسار ماهو بالاقساط

ومن الطلاق ان النوايا شريفه

ماني بتاجر ادبل الغاط بالغاط

ولا اجمع الدينار وانا حليفه

لكن في امثال العرب قبل الاقباط

قد مات ابورغيف ماكل رغيفه

وانا نمط شعري ما هو مثل الانماط

خذته مراجل ما خذيته وظيفة

هذا رد الشاعر - سلطان الهاجري

شوط الزلامي جر له عدة اشواط

وعرض سماري الجيش حزم وحتيفه

سندبها منا اليا وادي ارهاط

وحدر بها تومي عليها السفيفه

واهدت له الدوله من خيار الانواط

وبطله اثليم المسمى مضيفه

وصفت له الدنيا عساكر وضباط

وعين الرضى عن كل عيب كفيفه

يوم العرب كانوا قووين وانشاط

وديارهم في كل عام مريفه

واليوم راحت كنها خيط مطاط

وراعي العسيف ازرى يروض عسيفه

تخبطوا فيَ المهبل تخباط

وصاروا سوا راعي الشداد ورديفه

يابوجميل ارسالتك راس مشخاط

ومظرفه في عود سمره وليفه

ومضمونها بس اربع احروف وانقاط

ياثقل معناها لو انها خفيفه

تنجح لحم وتشعوط الروس شعواط

يعني حريقه والحرايق امخيفه

مخطوطة ِ ماخطها كل خطاط

الا انت ياللي مفرداتك عنيفه

لو ربطت كل الشياطين برباط

ماشالت الانفس اذنوب كليفه

اقلط ولك في مجلس العز مقلاط

واللي مايعرف كيف خله بكيفه

واسلم عدد رحلات تموز واشباط

مالاح براق يشوق رفيفه

ومايسكن الطائف من جعيد وسواط

والي هنا ماعاد عندي ماضيفه

هذا رد الشاعر - مانع بن شلحاط

كلن لقرصه حاش جمره بملقاط

ما ظل لي ما يشعل اعواد ليفه

شاعر ولي منهج ومبدا ومقلاط

ونفسي لجمهوري خضوعِ وليفه

عايش بخير ولا عليّ نقص واقناط

باسم السعودي وابن زايد خليفه

بين التميمي مجلسي وابن مواط

والشيخ جاسم لا لحقني كليفه

وارتب الساعه بلسعات الاسواط

بعد اذن منهم يحتمون السقيفه

اللي تساعدني بتعديل الأغلاط

جزاه من يحسب على الشعر غيفه

صوت الزلامي يوقظ الفاهي الغاط

شعفِ يرج اهل القوافي وحيفه

على نمط وترد له كل الأنماط

حيث البروز منين وجه حليفه

يشري بكاش وما يعامل بالاقساط

ساع الفقير يقوم يمضغ رغيفه

ابو جميل اعتاظ من عقب الاقباط

قوم العوالي في الديار المريفه

ربعِ خذوا في نجد صولات واشواط

وجاوا الحجاز وخر بره وسيفه

داوا جروحِ صكها ريحة مشاط

ببيوت شعرِ مبهرات طريفه

أستدغم الشعار من تحت الاباط

والخنجر المسنون بسفل شفيفه

رشيد متحرفن بتزوير الابناط

وعن كم بشته كل عين كفيفه

لو تحدر الشعبان ما يحدر اوراط

ايسند الحاله ربيعه وصيفه

اختار له خمسه وجاء عنده اسقاط

في الاحتياطي يوم برك عسيفه

وجاء الاحتياطي خير من ينزل ارهاط

لوِ ان رشيد أهوى عليه برهيفه

يوم انه قال بسادس الربع تحتاط

ما قال عن عنتر بشعره وسيفه

لكنه قال بسادس الربع تحتاط

يكفيك عن عنتر ورمحه وسيفه

جرده من شعره على شاش شمشاط

هروج عود ما يمد الكسيفه

والسادس اصبح خير من رز قسطاط

وانا مع الخمسه وانا اخو لطيفه


.

المصدر: الملتقى الجماهيري للشاعر محمد بن فطيس المري

إنْتِقَآءُ يَعْبَقُ بِعُطَورِِ آلْجَمَالِْ
لك كٌلُ السَعَادَه
..... وَعُنْقُودُ أَمْتنِانْ ~
تُجَآوِرٌ رًُوحَك..