جديد بن فطيس - مفتاح الاشعار

جديد بن فطيس - مفتاح الاشعار

• عقب اربعين سهيل بهديكم افكار
  مني ومن قلبي لمن يحترينا .
  
  الجو زان وبشر الوقت بأمطار
  جعله حوالينا وجعله علينا .
  
  والظل بارد والظهر ماهو بحار
  ومن المكيف فالعظام اشتكينا .
  
  القيض نعمه والشتا خير وخيّار
  تقول عقب الموت كنحن حيينا .
  
  واتلا الفروخ من الجبل هفهف وطار
  ونسمع بذكر الصيد تو وقرينا .
  
  والطرح له علم ٍ مع كل صقار
  واهل المكاتب بين عشه ومينا .
  
  والهجن فالتاهيل قعدان وبكار
  ياماغبشنا فالضباب وسرينا .
  
  نشري على البيعه ولا حن بتجار
  لو مانبيع الربع من ما شرينا .
  
  مقصودنا الناموس لو دونه اخطار
  شي عليه من الرضاعه ربينا .
  
  ماهمنا الدرهم ولا اخوه دينار
  وعلى محبتها حشى مانشينا .
  
  نختار لكن المقادير تختار
  والى خسرنا خير لو مارضينا .
  
  وصوت الجمل في طارف الذود هدّار
  وقمنا انوخ له من اللي نقينا .
  
  طيّر وبرها واكتست زين الاوبار
  ولا عاد رشينا لها لا سقينا .
  
  واول متالي لقحانا تحتها احوار
  ومن المياه اللي عليها قزينا .
  
  وراع الضرايب فالركابين محتار
  الله يبارك مالديه ولدينا .
  
  وذحاح قرنس والهوى للقنص دار
  وحنا من الديره واهلها قضينا .
  
  امن المخالي ننفظ تراب وغبار
  وقبل امس شنذرنا الطيور ودعينا .
  
  نبغي لنا مع شبة الصبح مظهار
  للرملة العليا جنوب ايمينا .
  
  الفجر من سلوى جنوب مع القار
  وعلى بدو نكعه عصير ٍ ضوينا .
  
  معنا نوادر من شواهين واحرار
  وغير الطيور النادره ماقنينا .
  
  طب الحباري كلها درج وطيار
  مصقورة ٍ ولقبضها ما حبينا .
  
  مع كل شغموم ٍ مجرب وله كار
  ومنين ماكان السنافي خوينا .
  
  يازين ثرها راقص ٍ فوقه الفار
  وثرها عفا عقب المغدا ثرينا .
  
  شي يروع ويعمي قلوب وابصار
  الله يعافينا ولا يبتلينا .
  
  كنها الى طارت تصلفق على نار
  يالله ياهادي دليل اتهدينا .
  
  وظهر لها ثنو ٍ له اصيات واذكار
  شيخ الطيور وهو لابينا واخينا .
  
  احمد سليل المجد زيزوم الاشوار
  عمي ونور ابصارنا لاعمينا .
  
  ترقا وهو يرقا مع مثل دوار
  وحن باهتين فالهدد كل ابينا .
  
  الين قدهم نقطتين بالانظار
  نقبض اغترنا لا تطيح بيدينا .
  
  هذي هي الطربه ومفتاح الاشعار
  اللي بندفن عنّها ما انتهينا
  .
• 
  محمد بن فطيس المري

.

المصدر: الملتقى الجماهيري للشاعر محمد بن فطيس المري