طعم المسا #شعر

طعم المسا #شعر

.

معك طعم المسا غير ومعك حتى السوالف غير

معك يا حلو تقليب المواجع بين كفيك

تبختر بين دقات الخفوق ونشوة التفكير

ترى كل الحياة اصغر من الي بيني وبينك

أحس انك تجي والعشب ينبت والطيور تطير

واحس ان السحاب يلوح براقه على يدينك

احس بروعة الدنيا واحس ان الزمان بخير

واحسك للحياة اعذب ندا ما انتب مثل عينك

أشوف الصبح لاشال الشفق هز الظلام عصير

واشوف الورد يضحك مابقى الا ينشدك وينك

واشوف الريح تقبل مستخفة دمها وتغير

تنثر لك شعرك وتنتثر سلة رياحينك

ورا ما ترقص القمرا بقلب خانه التعبير

مثل ما ترقص الألوان في مسرح فساتينك

دخيل انشودة العشق وذنوب ترفض التفكير

دخيل أخر ربيع مرني في حضن عشرينك

أنا اللي نزلك من برجك العاجي وجاك يسير

يمد لك اليمين ولا درى عن لهفة يمينك

واثرك تشوفني في حلمك اللي في رجا التفسير

على ذاك الحصان الأبيض اللي في ميادينك

شعرت بطعم سكينك من أول مابدا التقدير

تمثنيت العروق وقبل اكبر جرح سكينك

لقيتك قبل ما ابحث عنك في الابراج والتبصير

قريتك قبل اموت بلذة قراية فناجينك

أبي للناس اسولف بك واقول اللي يصير يصير

واحسك سالفة لو سولفوها شوهوا زينك

حشا لو تطري الفرقا ما اعدك راعي التقصير

عزاي اني ملكت بوقتها عرش اجمل سنينك

يقولون الزمان اغبر وانا اقول الزمان بخير

مادام اللي سكن في ناظري ما طاح من عينك

-

#شعر - #ناصر_القحطاني

.

المصدر: الملتقى الجماهيري للشاعر محمد بن فطيس المري