( لا تأمن الدنيا ) #شعر

( لا تأمن الدنيا ) #شعر

.


يارجم ياللّي للقرانيس مدهال

من ضاق صدره نط عالي طويلك

لمنهّض الجنحان باعلاك منزال

ينهد منك إن شاف جول ويجيلك

عدّيت في عاليك من ضيقة البال

عن ميل شيل الوقت يالله دخيلك

متحيّرٍ بالحيل من وقتنا ذال

متغيّرٍ يا وقت وزنك وكيلك

وقتٍ تشيّب مرّته روس الأطفال

في حومة النقيان ييبس صميلك

لاصار عندك مال عدّوك رجَّال

وان قل ما بيديك واعزتي لك

يا مشتكي منتاب الأول ولا التال

كلٍ بوقتك شايلٍ مثل شيلك

ما ينفعك بالضيق عمٍ ولا خال

ولا زميل أعمال ولا عديلك

القلب من بين المعاليق يجتال

يا منتظر ما أقسى نهارك وليلك

ما عاد يوجد حافظ السين والدال

يفشي بسرّك لادرى بك خليلك

حوتك بغبات البحر يذهل إذهال

ورعيل عصرٍ زل ما هو رعيلك

يا منخدع بأهل هلا والتبهلال

يتيّهك درب السلامه دليلك

ما كل من خاواك بالدرب خيَّال

ولا كل مشدودٍ يشوقك يشيلك

يا مصغي العيّال يا منفد المال

الى بلتك الباليه شد حيلك

لا يستفزّك بالحكي كل دجّال

عند النزال اصمد وصادم قبيلك

لا تشتحن لا صار بالحي جنجال

صاحي تطاوع من باخوك يحكي لك

اسفه جميع مكالمة كل جوّال

واحذر من اللي ما دريت يحبي لك

عدو ابوك أوصيك حطّه على البال

وخليل جدانك صحيحٍ خليلك

ترى الجداد اليوم ماهي كالاسمال

ياوقت جديك ما أبعده عن سهيلك

لا تامن الدنيا تراها أم الأهوال

تطول عليك الين تطوي طويلك

العمر مثل الفيّ لو طال زوّال

لابد من يومٍ يقرّب رحيلك

يابن الرجال اللي يحلّون الإشكال

من معجزات الوقت ويلي أو ويلك

مافيه حي الاّ بسكّانه رجال

احذر من اللي كالحنش ينطوي لك

للكرب من رب المخاليق حلاَّل

لا تكترب يالعبد والله كفيلك

احذر يصيدنك محابيل حبَّال

على الظلال ابليس لا يستميلك

تعرضك ما جنبك غلط وهبال

اترك سبيل الناس تترك سبيلك

-
#شعر
#عبدالله بن علي #بن_صقيه

.

المصدر: الملتقى الجماهيري للشاعر محمد بن فطيس المري

اترك سبيل الناس تترك سبيلك

الله الله

قصيده عذبه جزله
تسلم يمينك على هــــ النقل
ودي

سلمك الله يالحبيب
اشكرك