المجامل بعض الأيام ما يقضي لزوم

المجامل بعض الأيام ما يقضي لزوم

.
.
واهني الصخرة اللي ما يحرقها سموم
الزمان اللي يهد العزم ما هدّها

الزمان اللي تحدا قويين العزوم
لين مشّاها على ود ما هو ودها

والمجامل بعض الايام ما يقضي لزوم
لابو النفس الضعيفة ولابو جدها

مير تجبرنا العوايد وتجبرنا السلوم
نكتم الاسرار يالين تاصل حدها

كل ما كبرت وضاقت على عيال الرخوم
نحتزم لاعظم مصيبة وناطا خدها

يا عيال آدم وحواّ تراها ما تدوم
دورة الايام لابدها لابدها

الردي لا طاح جعله يطيح ولا يقوم
يتقدم للمهمات رجلٍ قدها

وانت يا حلمٍ حلمته مهو مثل الحلوم
يا ضحيّة مزح الاحلام مدري جدها

يا وليد البط وشلون ما تقدر تعوم
احترف في جزر الامواج والا مدها

ادري ان فالناس معطي وفالناس محروم
غصب عن بيض النوايا وعن مسودّها

جعل قسمي عند ربي من خيار القسوم
واحدٍ يعطي العطايا ولا يرتدها

ويا ضميري لا يهمك من الدنيا هموم
الصعيبة حلها والبسيطة عدها

جات في سد الشوارب ومن فوق الخشوم
كبر الضيفه وعش الضيوف وغدها

والمراجل ما توفّى بضافية الهدوم
كود بسيوف يشوق النواظر حدها

والردي لو درّس المرجلة في كل يوم
المراجل عند اهلها يزعزع ندها

يعتبر قسمه مثل قسم زاهية الرقوم
يوم تكحل رمشها والقرون تكدها

ما كسبت الارضي اهل النمايم والعلوم
يا رسول الحكي هات العلوم وودّها

الصفوف ثنين هذا دفاع وذا هجوم
وانت اظنك لانت معها ولانتب ضدها

شرهة الطيّب تعداك للغوج العزوم
لا نثنت روس البعارين تاكل بدها

وانت في سود الاظلة تريّح ومخدوم
وان ذبحك الجوع عان التكاسي كدها
.
-
#شعر//
عبدالعزيز الفراج
.
.

المصدر: الملتقى الجماهيري للشاعر محمد بن فطيس المري

القصيده للشاعر / سلطان بن وسام الهاجري
اسمحوا لنا على الغلط الغير مقصود.