اضيع بغيابه

اضيع بغيابه

.
.

قالوا تحبه وقلت: آموت واحيابه
شوفه يجيب الفرح والهم يقفيبه

المترف اللي عليه النفس طلابه
اشتاق له واشفق لشوفه واماريبه

غض صباه وعليه اعيون جذابه
يا خف دمه ويا حلوه ويا طيبه

يا عاذل القلب عن حبه ترى مابه
في كل هالغيد مثله يوم احلّيبه

احب ضيقه واحب ارضاه واعتابه
واحب ما يهتوي لو كان ماليبه

واحب طاريه واحب الذي جابه
واحب قاع عديل الروح يمشيبه

حبه ملكني بسيف العشق وانصابه
والقلب مملوك فالحب لمعازيبه

ما صاب نفسي بعد فرقاه باسبابه
والحب بلوى وانا يا ناس مبليبه

لا واعذاب الحشا من غيبة احبابه
يزيد جرحه مع الأيام تعذيبه

والوجد ناره بوسط الجوف شبابه
حرق خفوقي وشبت بي لواهيبه

قلبي من الوجد صابه منه ما صابه
والفكر مع طيفه ايصبح ويمسيبه

طبيب قلبي ليا من ضاعوا اطبابه
يا جعل الايام في دنياه تبطيبه

مدري على الله متى بيرد واهنابه
وافرح بشوفه وارحبه واهليبه

قالوا تحبه وقلت: اضيع بغيابه
وجريت صوتي من الآهات اغنيبه
.
-
#شعر
بندر بن سلطان العبود
.
.

المصدر: الملتقى الجماهيري للشاعر محمد بن فطيس المري