غــابت

صح الله لسانك يا فهد .. قصيده طيبه بدون مجامله
وانت يمكن ما لحقت علي هنا ,, انا احب اقرا القصيده اللي قدامي / وما اكتفي بالنظر وارد .. ولكن
احاول اعيش جو اللي كتبها عشان استفيد منه اللي اقدر استفيده .. .. واحنا نكتب قصايدنا هنا عشان نستفيد
والنقد جايز واتمنى تتقبله بصدر رحب ,, وابي ابيّن لك نقاط الضعف والقوه عندك

لما تقول

يا ذى القمــر والليـل تكثر غيومه
...............والبرق يبرق والهماليل عيني

هنا وقع تشبيه في غير محله .. يعني انت شبّهت هماليل المطر في عينك .. وانت قصدك تشبّها في دمع عينك

يعني اذا قلت مثلا .. " من هماليل عيني " هنا انت تشبه الدمع بالهماليل

لما تقول
قالـــوا تقاليـد القبايــل سلومـــــه
.............. عيبٍ تذب الدرب حينن وحيني

انا ما فهمت قصدك بالشطر الاول .. هل تقصد تقاليد العرب سليمه ؟؟
اذا هذا القصد انت جبرت الكلمه في غير لفظها الصحيح عشان الوزن ،، اما اذا انت تقصد " اسلومه " من سلم العرب فـ بيكون فيها كسر
يا من يبشرني وشنهي عـــــلومه
.............عسى وليف الروح نوره يبيني

هذا البيت اعجبني ,, انت استخدمت اسلوب الاستفهام والرجا

وهذا ما يقلل من انك شاعر .. بالعكس شاعر و بيكون لك شان ان شاءالله

يا ذى القمــر والليـل تكثر غيومه
...............والبرق يبرق والهماليل عيني
رجلي على المرقى تعلت رجـومه
.............يعوي عوى ذيبٍ حدته السنيني

صح لسانك يافهد .. تحياتي

ابدعت وكلمات استنشقت عبير صدقها
من القلب الى القلب

الف شكر لك على الابداع والله يوفقك

تقبل مروري وتقيمي

أهلاً وسهلاً اخي حمد السبيعي

أبد وأنا إخوك أتقبله ولا فيها شي

نفيد ونستفيد

الكلمه بينه من عنوانها ( غابت )

معنى البيت : يا ذى القمر والليل تكثر غيومه ..... والبرق يبرق والهماليل عيني

يا ذى القمر : المحبوب
والليل تكثر غيومه : كنايه عن الحزن والكبت
والبرق يبرق : الهواجيس
والهماليل : الدموع يعني دموع عيني

ولو قلت والبرق يبرق من هماليل عيني ضاع التشبيه في البيت

معنى البيت : قالوا تقاليد القبايل سلومه ..... عيبٍ تذب الدرب حينن وحيني
يفهم البيت في البيت الذي قبله والبيت الذي بعده وتتضح الصوره وعن مشكلة الغياب

من حكم عاداتٍ علينا لزومه ......... تفرض نفوسٍ خلت الزين شيني
قالوا تقاليـــد القبايـل سلومه ......... عيبٍ تذب الدرب حينن وحيني
وإحترت منها وأصلها إمعدومه ........ تقــــول ما كنى عرب مسلميني

أنا أقصد سلومه
وليست سليمه أو إسلومه < اكيد يجي كسر
يعني سلوم العرب وتقاليدهم

ولو قلت بالمعنى الذي فهمته
لازم اغير الشطر الثاني من البيت ,, ولا تركب عليه ولا رسمت معناي

عيبٍ تذب الدرب حينن وحيني
يعني لا تلحق نفسك المشاريه والمناقيد
كذى اكتمل المعنى وفهم مقصده

بارك الله فيك اخي حمد وشكراً لك

صح بدنك اخي عزام وبالتوفيق

صح بدنك اختي عاليه وتسلمين بالتوفيق

معنى البيت : يا ذى القمر والليل تكثر غيومه ..... والبرق يبرق والهماليل عيني

يا ذى القمر : المحبوب
والليل تكثر غيومه : كنايه عن الحزن والكبت
والبرق يبرق : الهواجيس
والهماليل : الدموع يعني دموع عيني

انا معك وما اختلفت .. واعرف انت وش شبّهت .. انت قلتها بنفسك انك شبّهت الهماليل بالدموع ؟؟
لما تقول ... " القلب ذيبـن عوى " على سبيه المثال .. هذا تشبيه بليغ خال من اداة التشبيه .. شبّهت القلب بالذيب

لما تقول " الهماليل عيني " هذا تشبيه بليغ وبنفس السياق .. شبهت الهماليل بالعين مب بالدمع

وانا قابل للخطا والصواب واتمنى باقي الاخوان يفيدونا ، وانت شاعر ولا فيها كلام