قصه يـا سخيـف الذرعـان مانيـب مـرجـوج

قصه يـا سخيـف الذرعـان مانيـب مـرجـوج

الشاعر المعروف بندر بن سرور العتيبي رحمه الله شاعر فحل

وتحفظه كتب التاريخ للابد كان بندر في حياته مشاغبا ومزعجا

للسلطات في المملكة اثناء حكم الملك فيصل حيث كان يهرب

البضائع من الكويت ليكسب من خلال ارباحها لاختلاف

السعر في ذلك الوقت وكان أمير المنطقة الشرقية سعود بن جلوي

غاضبا من بندر حيث قبض عليه اكثر من مره ويخرجه أمير عتيبة

تركي بن ربيعان امير الفوج التاسع بالحرس الوطني وهو من شيوخ

قبيلة عتيبة اللي لهم كلمة عند الملك والحكومة وكان ياخذون تعهد

على بندر بعدم التهريب الا انه مطنشهم ولا يسمع الكلام ..

المهم وصل للامير بن جلوي ان بندر هرب بضاعه ولا قدروا

يمسكونه فحلف بن جلوي ان يقتل بندر اذا قبض عليه ومعروف

عن بن جلوي قسوته وشدته وجبروته اثناء حكمه للمنطقة الشرقية ..

ووصل لبندر كلام الأمير وتهديده بس ما ارتدع ..

وفي يوم وبعد المغرب بشوي كان بندر نازل مع النفود بسيارته

الونيت وتفاجأ ان حرس الحدود مخيمين اسفل النفود وأيقن انه

مقبوض عليه لا محاله فهو لا يستطيع العودة لأن النفود عالي

وإذا نزل معناها مسكوه فأوقف السيارة وترجل منها ورجع على

أقدامه وصادف سيارة وركب معاه وطلب منه يوصله لبيت الشيخ

تركي بن ربيعان ووصل له حوالي الساعة وحده بالليل وقام يطق

الباب بقوه والليل هادىء وصحى كل اللي بالبيت وكان الشيخ بن

ربيعان بالدور العلوي وراحت بنته تفتح الباب وبندر يطق الباب

بقوه وفتحت الباب وهي ما تعرفه ولا قد شافت بندر وقال لها

ابوها من اللي عند الباب يا بنت قالت رجال واحد مرجوج يبغاك

( وسمعها بندر وهي تصفه بالمرجوج ) قال خليه يدخل للمجلس

وغير الشيخ ملابسه وقامت البنت تسوي القهوه ولما دخل الامير

تركي بن ربيعان وخلفه بنته معها القهوه التفت عليها بندر وقال



يـا سخيـف الذرعـان مانيـب مـرجـوج
================= رجّـتـنــي الدنياء بغدر ٍ وحـيـلـه
يا بنت لـولا اللـي علـى تاسـع الفـوج
================= تـركــت نــجــد وعــــزوةٍ بالقـبـيـلـه
لاشــك حاديـنـي عـلـى نـجـد هـيــدوج
================= مسقـي الفيافـي ليـن يـدرج مسيـلـه
تركـي ليـامـن الـبـلاوي غــدن عــوج
================= حـمــله عتـيـبـة كـلـهـا مـــا تـشـيـلـه
يرسي كما مينا البواخر علـى المـوج
================= ومنـيـن مــا صــك البـحـر يرتكيـلـه
مـــادام تـركــي حـــيٍ مـــا ودي أدوج
================= وإن غاب غبت من الرجوم الطويله

عرف الشيخ بن ربيعان من الأبيات ان بندر في مشكلة ويبي الفزعة

وأبتسم الشيخ وقال أبشر يا بندر وش طلبك وأخبره بالسالفه وأنه

خايف ينمسك ويبيه يشفع له عند ابن جلوي قال له أبشر يا بندر

وركب بندر مع الشيخ بن ربيعان بسيارة الشيخ وراحوا للدمام

ووصلوا لقصر الأمير بعد صلاة الفجر بدقايق وكان الامير سعود بن

جلوي متعود كل يوم بعد الفجر يجلس بالمجلس يتقهوى ويسمع

صفحتين من كتاب الحديث فأوقف بن ربيعان سيارته مقابل المجلس

بس بعيد وكان الوقت لا زال ظلام ونزل لوحده وسلم على الامير

وجلس بجانبه ولما صب المقهوي الفنجال للشيخ بن ربيعان انزل على

الأرض ووالتفت عليه بن جلوي وقال وش فيك نزلت الفنجال قال

بن ربيعان لي طلب قال اشرب فنجالك واللي تطلبه جاك فشرب بن

ربيعان الفنجال وقال طلبه وزعل بن جلوي وقال والله لو اني داري

انك جايه علشان بن سرور كان ما عطيتك طلبك وأنت تدري اني

غاضب منه لكن دامك شربت الفنجال فطلبك جاك .........

..

المصدر: الملتقى الجماهيري للشاعر محمد بن فطيس المري

ي زين حيآتهــم أول

بنت روقه يعاآفيك ربي يالغلآ ..

أستمعــت والله

تستىهليــن ++

يـا سخيـف الذرعـان مانيـب مـرجـوج
========== رجّـتـنــي الدنياء بغدر ٍ وحـيـلـه

يسلام يابنت الروقه ابدعتي بالاختيار موافقه خير

لاشــك حاديـنـي عـلـى نـجـد هـيــدوج
================= مسقـي الفيافـي ليـن يـدرج مسيـلـه
تركـي ليـامـن الـبـلاوي غــدن عــوج
================= حـمــله عتـيـبـة كـلـهـا مـــا تـشـيـلـه

الله يغفر لهم ويرحمهم رحمه وااسعه وكل مسلم ,,
بنت الرووقه بيض الله وجهك ولاهنتي على مانقلتي من ابداااع ,,

لك كل الشكر وكل التقدير ووافر الاحتراام .

وهل يخفى بندر بن سرور

ابدعتي ,, ويا حبي له هالشاعر الله يرحمه بواسع رحمتة ,,

جزآكم الله خيرآ كثيرآ

ونفع بكم الاسلام والمسلمين

ونعم فيك وفي الروقة



وبيض الله وجهك ، لطالما بحثت عن هذه القصة

وها انا اليوم اجدها


فألف شكر

يعطيك العافيه ع الطرح المميز
سلمت يداك
أرق وأعذب التحايا

الله يرحم متنبي عتيبه

والله يرحم الشيخ ابن ربيعان

والله يبيض وجهك يابنت الروقه

انتي جزله ولاتجيبين الا جزل

طال عمرك