~ مايغدر ابيوتنا من عزها طيحت عمدها ~

~ مايغدر ابيوتنا من عزها طيحت عمدها ~

انعقد وجه الظلام وهمت يالطرف القريري
مابعد ليل العيون الا الصباح اللي هجدها

بان وجه النور واستضحى على القاف المغيري
غن يا طرق الغرام وحط في كبدي كمدها

مرحبا يا المخطر الحامي على الضلع القصيري
جيت مثل الغيمه اللي برقها يسبق رعدها

الحنايا مابها الا شاهد الوسم الأخيري
والروابع هزها الطاروق والصادر وردها

شق ستر الغابيه وتبين لك لو هي ستيري
الجروح مزهبه والطعن في المقتل بجدها

ابشر ان آخر طعونك وصلني وادمى ضميري
ليت غربتك الطويله .. ماعقلك الله بعدها

جيتني بالهم مقبل.. لامفر..!! ولامطيري..!!
وانت يوم تروح ..نفسي ماجهدك اللي جهدها

حارت اقدامي على درب الفراق وقلت سيري
مايغدر ابيوتنا من عزها طيحت عمدها

والله ان اصغر ذنوبك كسرت العظم الجبيري
عقب ماربي عصم روحي ولهمهّا رشدها

جيت والشاهد على القصه مثل راس البعيري
لعنبوا سود الوجيه ولعنبوا منهو عبدها

دمعة التمساح طاحت من عيونه في ضميري
احرقتني جعل عينه من عماها في رمدها

العهد من قلة الذمه وضيعات الشويري
راح في ساقة عباد ماحدٍ يامن عهدها

المعذره يا قطين الود .. يامهوى نظيري
قبل صلفات الليالي لا تحطك في نصدها

انت مني وانت فيني وانت شري وانت خيري
من حياتي .. لين تدخل جثتي داخل لحدها

ان بغيت تقول يكذب .. خلني يقنعك غيري
جعل سمحات الليال يهب من صوبك سعدها

العرب..من كل فج يقودها سلك الحريري
انت معطى .. والعلوم الخافيات امر وادها

قلت لك "حرزٍ مكين" وقلت لي جوي وطيري
البقى في روحك.. وجعل امسها ماهوب غدها

الدهر يومين واليوم المسانع يستديري
ولاتدوم النعمه الا عند ممتنٍ حمدها

بس انا بنشدك وآخذ من قليلك في كثيري
والمثل قد قال من دور على حاجه وجدها

هو يصير اني احبك فالخفا ..!! او مايصيري..؟
عقب ما مرت عليك الروح واخطت من وعدها

المصدر: الملتقى الجماهيري للشاعر محمد بن فطيس المري

ههههههههههههههه
ناوووي تعذبنا يعني ياشآســـع...&*
حسيت نفسي ورع اولى إبتدائي وإلا قلت خليني
أكبر نفسي عجوووزهـ بمحووو الاميه يادوووب تقرا

طيب وحتى هذي تسلم عليها
المهم ماننحرررم من جديـــــــدك
الله يحفظكـ يااااااااارب

يعطييك العآفيه

حياكم الله جميع

صح لسانك
ويعطيك العافية

قلت لك "حرزٍ مكين" وقلت لي جوي وطيري
البقى في روحك.. وجعل امسها ماهوب غدها

الدهر يومين واليوم المسانع يستديري
ولاتدوم النعمه الا عند ممتنٍ حمدها

بس انا بنشدك وآخذ من قليلك في كثيري
والمثل قد قال من دور على حاجه وجدها

هو يصير اني احبك فالخفا ..!! او مايصيري..؟
عقب ما مرت عليك الروح واخطت من وعدها



شاسع المري


اسم متألق في هذا الصرح لله درك على الابيات اللي قريتها لقيت الجزاله فيها من اول لبيت لاخره


سلمت لنا اناملك ي كحيلان

الله يحيكم جميع على التواجد


سمو المراجل ,,, اسعدني حضورك الرااقي يالقرم