مرثية في والدي ....................

مرثية في والدي ....................

السلام عليكم ورحمة الله وبركاته

حبيت اشارك معكم في مرثيتي في والدي الذي وافته المنيه
مغرب الاربعاء
25-12-1431هــ
رحمه الله رحمة واسعه
........................


مدخل ....

ليت المنايا لانوت نزع الارواح


تعطي خبر ماتفجع الحي بالميت



...................
......................................


صدمـة زمن ونـة حزن دمعــة فراق***تجـمعــن بغــياب شمس الربـوعي


مع عبرةٍ بالجوف من بين الاعمـاق***مع شهــقةٍ هزت محاني ضلوعي


تجــمَعــن والحــزن للدمـع دفـــــــاق***لحــظـة وداع ٍ مابــعــدها رجوعي


منها انذهلت وصرت في موقفٍ شاق***من مــشهدٍ قــدام عــيني يــروعي


اشوف ابويه بين زفرات وشهــاق***في حــزةٍ ماتــفــيد فــيها الفــزوعي


ابكي وانــادي يايــبه بس مـــافــاق***ادري بوضــعه بس ماني قــنــوعي


واصــيح للــدكتور واليـاس مــنساق***مالــي جـدا ماغـير هـــلَ الـدمـوعي


ثم انخفض ضغـطه ويبسنَ الاريــاق***والــمــــوت حــلَ ولاتـفــيد الــدروعي


واناظر الشاشه وانا بحالة ارهاق***لين انقطع صوت الجرس عن سموعي


برهة زمن والتفت الساق بالساق***انا اشـــهد ان الــموت سـيفـه بــتوعي


ثم شـالوا اسلاك المغـذي والاوراق***واقفوا بجسمه غـصب ماهـــو بطوعي


واقفيت من عنده وانا تقل منعاق***اجــــــر رجـليـــه ويكــــــثـر وقوعي


في ذمتي بعده علي الفضاء ضاق***اظــلم نهاري وانطــفت به شــمــوعي


عيني سكنها الحزن والنوم مالاق***عشــرين لــيــلــه والزياده اســـبوعي


اسهر من غياب الشفق لين الاشراق***ولـــيـا انـتهـى لـيـلي توسـدت كـوعي


وليا غــفـت عـيني لـمـح تـقـل براق***طــيفه يــصــحيــني ويــزداد لـــوعي


يالله عــسى قبره مسـاحاته آفــاق***فــيـه الـنظـر يـمتــد مــاله مـنوعي


وبـجــنة الفــردوس فـي منزلٍ راق***من الثــمر يقطــف على كل نوعي


هــذي هـي الدنـيا بهـا الـمر ينذاق***وانــا مـن المكــتوب ماني جـزوعي


الـعـمر رحـلـة درب والـمـوت دراق***لابــد سـهـم الــموت يــاتي فــجـوعي

،،،،،،،،،،،،



مخرج:





يالله ياللي رحمتك مالها حدود
تعفو وترحم عن عزيزٍ فقدناه




معجب عبدالله السليمي

المصدر: الملتقى الجماهيري للشاعر محمد بن فطيس المري

الله يرحم والدك ووالدينا جميع والله يسامحك ياويش ادخلني علي قصيدتك اليوم بعد ماكنت سالي ماحسيت الا ودمعي من العين سالي
لاتعليق.

الله يرحمه الله يعطييييك العافيه ...ودي.. آهات

البقااء لله وحده

كل ابن ادم ماش على هذا الطريق

..معجب السليمي

صح لسااانك يالجزل في هالمرثيه

ابدعت في اختيار حرفك المميز

تحيتي لك ورحم الله والدك وجميع المسلمين

الـعـمر رحـلـة درب والـمـوت دراق***لابــد سـهـم الــموت يــاتي فــجـوعي

ياسلام يامعجب قصيده اثرت فيني يالغالي

والله يرحم الوالد ويجعله انشاءالله من اهل الجنه امين وجميع اموات المسلمين

وقصيده قمة الروعه اشكرك عليهاا يالغالي

ونا ماقول الا اشكرك على القصيده الرائعه ولك ودي وردي وتقيمي يالغالي

تحياتي لسموك

الله يرحم ابوك وابي واموات المسلمين
ذكرتني بالغالي الله يجعلهم من اهل الجنه

السليمي...الله يرحم والدك ياااااارب
وعسى الفردوس الاعلى دارهـ
وإنتا الله يجزاك الجنه يارب

الله يرحمه يامعجب .. وخير القصيد ما صدق

هذا الكلام صح لسانك ولاهنت

والله يرحمه رحمة واسعه

الشاعر جابر المري
الله يجزاك خير
واسف على تنقيض الجروح
لكن مالنا الا الصبر والدعاء لهم بالرحمة

شرفتني بحضورك يالغالي

فالف شكر
تحيتي وتقديري

اهااااات
الله يعافيك ويجزاك خير
مشكوره على تواجدك العطر
تحيتي وتقديري