تعبت اجامل الدنيا

تعبت اجامل الدنيا

هذي قصيده ناصر بن عبيد الجمعان الغيثاني المري

تعبت اجامل الدنيا تعبت اداري العدوان ..
تعبت اخالف الواقع وانا شوفي يقديني ..

تعبت ارسم على وجه الحزن بسمه بلا وجدان
بقايا بسمة ماتت مشاعرها من سنيني ..

عجزت اكذب على نفسي واقول ان الحصان حصان ..
كبا مليون كبوه والامل مازال يحديني ..

دفعت اللي معي في الطير واثره طير ابن برمان ..
تعشاني خبيث العش قبل انه يعشيني ..

اجود زلة الصاحب وامشي غلطة الغلطان ..
كفى ياوقت لاتضغط علي ماراح يكفيني ..

درست الهم واجزاءه عرفت الزود والنقصان ..
ولكن مادرست من الفرح حاجة تمشيني ..

وصلت ابعد حدود الصبر ماحصلت لي عنوان ..
وضاعت خطوتي بين العوارف والمجانيني ..

اشوف الناس تضحك المواقف تدعي الاشجان ..
لقيت اللي يضحك كل خلق الله يبكيني ..

سرقت من الزمن لحظة فرح في غفلة الاحزان ..
وسرت المتهم بضياع لبنان وفلسطيني ..

واثر فرعون مايقدر يمشيها على هامان ..
وهذي سنة الله في الفقارى والسلاطيني ..

زماني لا متى وانا اسير الهم والحرمان ..
كرهت الصبر بالمره وهو ماعاد يبغيني ..

على صرح المصايب صحت يادنيا تراني انسان ..
بشر مثل البشر وابسط ولامني ولافيني ..

دخيل الله يادنيا العنا وش سبة العدوان ..
اموت براحتي بس اعرف اللي بينك وبيني ..

اذا كان السبب يرجع لنفس ترفض السلوان ..
خذي سمعي خذي شوفي خذي روحي وفكيني ..

الا ليت الزمن يرجع ويرجع كل شي كان ..
ولكن خايف القصة معه ترجع وتنهيني ..

كفايه يازمن ماعاد لي في اللي تبقى شان ..
خذيت اللي مضى واللي بقا ماعاد يعنيني ..

مجرد ماقعدت احاول ادرس فكرة النسيان ..
تحاليت البكا وارخيت للدمعة هدب عيني ..

ولولا الله وادري ان الحيا شعبه من الايمان ..
لشق الجيب واكسر حاجز الكتمان بيديني ..

وابين قصة يبكي لها اللي يعبد الاوثان ..
واصيح صياح واخلي القرايب تبتلش فيني ..

زماني ويش ذنب ابن المهادي يوم جا تعبان ..
غرير ينتظر صبحه مثل باقي البزاريني ..

جريمة قتل متعمد ادلتها شهود اعيان ..
ولكن طاحت الدعوى على روس المساكيني ..

نجوم الليل لاشفتي نصايب قبر ابن جمعان ..
دخيل الله دسي وصف قبري عن دياييني ..

أخاف الحزن يدري بالخبر ويجدد العرفان ..
واخاف الهم لايعرف مكان القبر ويجيني ..

تــحياتي ..

المصدر: الملتقى الجماهيري للشاعر محمد بن فطيس المري

وصلت ابعد حدود الصبر ماحصلت لي عنوان ..
وضاعت خطوتي بين العوارف والمجانيني ..

.. صح لسان المري

وصح ذوووقك يهدااج

تقبل مروري