محاورة الشيخ عبدالله بن جملا والشاعر صقر سليم

محاورة الشيخ عبدالله بن جملا والشاعر صقر سليم

الشيخ بن جملا
هلا مرحبا ياسليم في دار ابو سفيان
وليل السعد مافيه بعده ولاقبله

لقيت البقيلي ليلة النص في شعبان
يراقب سحاب الصيف لين انتثر وبله

صقر سليم
يدوم البقا والامن في ساير الاوطان
وراعي الوفا طيبه مع الناس،يحسبله

اشوف البروق تلوح في مقدم الامزان
ولكن عيا ينبت الضلع والعبله

الشيخ بن جملا
ويارب راسي رد راسي مثل ماكان
واسولف واراجع وقتي اللي طوى حبله

ليا قلت شاور قال بسم الله الرحمان
يدور مثل يضرب علينا ويضربله

صقر سليم
عسى الله يعز الروس ويقوي الامتان
ويرزقك مع راسك متونٍ تناسبله

مريح بجنب العد وتقول انا ضميان
كبودٍ عليها طيب وكبود مندبله

الشيخ بن جملا
يقولون صح لسان وش لون صح لسان
وقافك يسر هذيل وسليم تطربله

انا العام ضحكي ثور المدفع الغضبان
ولاعاد لي شرهه على الطار والطبله

صقر سليم
ترى الملح مايصلح مع الورد والريحان
وانا وانت مانمشي ورا الخطه الخبله

على الله زمانك غير عن باقي الازمان
ماعاد البعير شعيل يسمن من الربله

الشيخ بن جملا
انا وانت مانشره على باشة السلطان
الين السميّك والعقارب تعقربله

سقى الله زمانٍ جاب وضحا وبن عجلان
وحد الليال ترد عنتر على عبله

صقر سليم
يامال الشحم ماطار طيرٍ بلا جنحان
ومن ينشب الدنيا يجي يوم ينشبله

متى خاتم سليمان يرجع على سليمان
تجوز الخطوبه طال عمرك بلا دبله

الشيخ بن جملا
يقولون خمسه اركان ويقول ست اركان
وروّح يصلي مير ماهو على قبله

تسلّم وسلّمها مع الشكر والعرفان
ولاني بجاحد سري اللي تسربله

صقر سليم
صحيح الزياده بعضها يعتبر نقصان
ولكن راع الابل يعرف حساب ابله

كبير العقل ماقارن المسك بالدخان
وكلن نصيبه ياابيض الوجه يكتبله

الشيخ بن جملا
ذكرت الولد والخال وسليم والريعان
ترى الطرقي العجلان محدٍ قطع سبله

كرى ياكرى نعرفك مشرف على نعمان
ولاهي خساره فيك لو كنت مكسبله

صقر سليم
ولو تستعيد الذاكره لك جمل وحصان
وهذاك ترقبله وهذاك ترقبله

ماندري وش الحاصل من الذنب والغفران
عسى الساحره مالله خلق لاذنها طبله

الشيخ بن جملا
توحيت ولياهم ينادون ياراكان
ولابان لي غير ابن حثلين واسطبله

زعلت وقطعت النيل عن مصر والسودان
تدور سبب يقطع علاقه تسببله

صقر سليم
ضروسك قويه وانت مبسوط بالنيبان
ولو كان يلعبلك زمانك وتلعبله

الشيخ بن جملا
تفاهم وكلمة راس يوم التقى الجمعان
ولكن لاتحرج عميلك وتنشبله

نواعد ونستاذن وندخل مع البيبان
ويازين صقر سليم والكامل اقربله

صقر سليم
انا جايبن لك بن من ضاحية خولان
بعيد المدى لاتحسب البن فالحبله

مايبكي على مرسي حد الا من الاخوان
ياساحب على درب الشقا ويش تسحبله

الشيخ بن جملا
ترى البن يقعد راسي القاسي الخرمان
ولكن جبلي والخويّ الوفي جبله

ياطيب البخيل اللي يقول الكريم معان
تقلب عسى سود الليالي تقلبله

صقر سليم
اظنك تبي لك زاد والزاد من عمّان
على شان مايبقى لك اصحيب تنصبله

المصدر: الملتقى الجماهيري للشاعر محمد بن فطيس المري