قصيدتي ورد الشاعر منيف العتيبي

قصيدتي ورد الشاعر منيف العتيبي

هذي قصيدتي التي شرفني بمجاراتها شاعر بحجم منيف العتيبي

يالليل يا ليـل السهـر والتعاليـل=هم يجـي فيكـم وهـم(ن) تجـلا
وهم(ن) يراعيني وانا أراعي سهيل=وسهيل غـاب وهـم قلبـي تعـلا
وسريت مع همي ليال(ن) مقابيـل=أطالـع همومـي وفيهـا أتـحـلا
وجلست أقلب بالصور والمراسيـل=كني غريب(ن) عن ديـاره مجـلا
حدوه ربعه عن طريقه على الميـل=في ليل مظلم وسط سيف(ن) يسلا
وفي غفلتن من ساعه باخر الليـل=جانـي هنايـه يـوم عنـي تخـلا
في غفلتن فيها صحي فاتر الحيـل=جانـي هنايـه يـوم حظـي تعـلا
وشكيت له ماصابني مـن تهـاول=شكيـت ليـن الـهـم روّح ووّلا
وشكيت له دمع انسكب بالمناديـل=وشكيـت هـم(ن )للمعاليـق تـلا
يا حظ ليه تغيـب ليـه البهاذيـل=تركتنـي والهـم فيـنـي تـسـلا
مالي جدا يا كـود جـر المواويـل=لو شفتني كنـي خميـس المعـلا
قال اسمعي يا غاليه عندنـا حيـل=ماعـاد أكررهـا حشـا ثـم كـلا
والله لذلل كـل الاصعـاب تذليـل=مهمـا حصـل ياعاليـه ماتـخـلا
لو تطلبي يا عاليـه فطـرن حيـل=ولو تطلبـي كوكـب مجـره تـدلا
قلت اسمع علومي ومن غير تطويل=ماعدت اصدق كـل حكيـن يشـلا
عطني براهينك ولا تنقـص الكيـل=ودر النياق الشعـل ماهـي مجـلا
أخاف من جِهّيّل كدشـن مخابيـل=يحللون الهـرج نـاس(ن )مبـلا
ويعدلـون بكيفهـم فيـه تعـديـل=ويلبسونـه طـوق وردن وفــلا
قبل أنطق الجمله لها الـف تحليـل=اراجـع الجملـه قبـل لا تـمـلا
وأضلل الناقص من الحرف تضلـل=ومن يتبع الغـرّات يصبـح مخـلا
و ماني من اللي يركعـن للأقاويـل=أنـا ركوعـي للولـي فالمـصـلا
واقدر الوافـي ولا أحـاول أعيـل=ومن عال ماله غير سيفـن يسـلا

رد الشاعر منيف حريبان العتيبي

بالمنتدى من غير سابـق دواليـل=لقيت رسم(ن) فيـه قمـت اتمـلا
قرايض(ن) تشفي صدور المعاليـل=دانـة بحـر والمستمـع مايـمـلا
شرد(ن) تكود أهل النمش والدرابيل=مثل الخشوف اللي بـراس المفـلا
اللـي عليهـا يتعبـون الحلاحيـل=ماجابهـا قولـت ياليـت ولـعـلا
يالعاليـه فكـرك ينـوف الاقاذيـل=وشعرك على رجـاح فكـرك يـدلا
شبيتي من الفكـر بالشعـر قنديـل=نـوره تجـلا مـن خيالـك وطـلا
طرايف(ن) مثل القـراح الشهاليـل=منهـا مجاديـب الضمايـر تـعـلا
وعن الهزل مابـه عليـه مداخيـل=حاشـا و كـلا حرفهـا مستـجـلا
شعر البني مشهود من سالف الجيل=لو قيل عنه من الرجـال اضمحـلا
لوقيل في شعـر الغناديـر ماقيـل=ماني مطـاوع فيـه هـرج المغـلا
قول(ن) على غير الحقايق غثا سيل=لوكـان ماكلفـت فـي مـن يـزلا
الناس من خلقو على الحط والشيـل=شتان عن الراي لـو كـان اخـلا
ولاكـل مانسمـع نعـده تماثـيـل=الشعـر واضـح منهجـه مستقـلا
بعض القصيد اليوم يحتـاج تئويـل=غث(ن) منه غر الصحايـف امٌـلا
الهزل يلقالـه فـلاعـلام تسهيـل=محد(ن) يقلط عـن سجلـه سجـلا
والجزل حضه مع هل الهزل تاجيـل=ولاهي بعيد ان قيـل مالـه محـلا
وشعر(ن) مايلقا في حروفه محاصيل=ودك يغلونـه عـن السمـع غـلا
قلته وانا ياداعـج العيـن بالميـل=مالـي ورى ماقلـت غايـه تخـلا
غير المجارا مـال مبـداي تعليـل=وراع الشيم فـالناس من حيث حلا
واللي جذبني فيـه الامـداح تقليـل=ماهـوب بـس ابــداع لاوالله الا
جللتي المعنا مـن الجـزل تجليـل=لين ان فكري فيـه رحـب وهـلا
ترحيب(ن) احلا من حقوق المخاييل=والذ مـن طعـم الحليـب المحـلا

المصدر: الملتقى الجماهيري للشاعر محمد بن فطيس المري

والذ من طعم الحليب المحلا ,,

انا اشهد بذالك صح الله لسانك ويعلم الله ابيات قمه قمه تهيض شعور كل شعر وتليق بمقامك ,,

وصح الله لسانك منيف العتيبي ولاهان وتستاهلين الثنا والله يعلم ,,

لك كل الشكر وكل التقدير .

ياسلام ياسلام احلاكلام
صح الله لسانك اخت ترانيم وصح لسان بن حريبان كلكم
من الشعار المشار اليهم بالبنان ولا جدال في ذالك


اختي ترانيم ويبدو ان الشاعر خالد العتيبي
معنا بالمنتدى الان فيه قسم موجود هنا بالمنتدى
وعنوانه صوت واصدى وكل قصايد المجاراه موجوده فيه
من ضمنها مجاراة عبدالله بن دخيل الروقي العتيبي
لاحدى قصايدي حبيت انوه ولكم مني جزيل الشكر

صح لسان الشاعر منيف العتيبي فديته جزل وكفو

وتسلم يدين شاعرتنا المميزه القديره ترانيم المطر
وانتي تعرفين شهادتي فيك مجروحه ومافيك حيله
مجاره اروع وصح السنتكم اثنينكم لاهنتو وعساكم سالمين
ارق التحايا لروحك اختي ترنيم

اقتباس المشاركة الأصلية كتبت بواسطة خالد العتيبي والذ من طعم الحليب المحلا ,, انا اشهد بذالك صح الله لسانك ويعلم الله ابيات قمه قمه تهيض شعور كل شعر وتليق بمقامك ,, وصح الله لسانك منيف العتيبي ولاهان وتستاهلين الثنا والله يعلم ,, لك كل الشكر وكل التقدير .

خالد العتيبي يسلم راسك تواجدك شرف طال عمرك لا عدمتك
تحيتي وتقديري لشخصك الكريم
لك من التحيه أغلاها ودمتم بود
ترانيم

اقتباس المشاركة الأصلية كتبت بواسطة سعيد محمد القحطاني ياسلام ياسلام احلاكلام صح الله لسانك اخت ترانيم وصح لسان بن حريبان كلكم من الشعار المشار اليهم بالبنان ولا جدال في ذالك اختي ترانيم ويبدو ان الشاعر خالد العتيبي معنا بالمنتدى الان فيه قسم موجود هنا بالمنتدى وعنوانه صوت واصدى وكل قصايد المجاراه موجوده فيه من ضمنها مجاراة عبدالله بن دخيل الروقي العتيبي لاحدى قصايدي حبيت انوه ولكم مني جزيل الشكر

يسلم راسك يالقحطاني ولا هنت
لقد أسعدني تواجدك
وأعتقد إني وضعتها بالمنتدى المخصص لها وهو صدى وصوت
تقبل تحيتي

نعم نعم اخت ترانيم اعتذر لك ولا الاخ
خالد العتيبي هم نقلو مشاركته بدون لا اعلم ذالك
وانا ضغطت على رابط الدعوه وكنت اظن اني لازلت
في قسم الشعراء لذالك اكرر اعتذاري

إبداع وجزاله وتدفق شعري هائل مع إن القاف يصعب على من لا يملك مثل التدفق الشعري لأخوي منيف والمبدعه ترانيم .. صح الله ألسنتكم على هالمجاراة الرائعه .. تقبلي مروري وتقييمي ومتابعتي لجديدك بم إنك شاعره بهالحجم ..

يآسلام
آبدآع x جزآلة
ترآنيم صح لسآنكـ ولاجديد سوى آلابدآع
وصح لسآن آلشآعر منيف وآسم على مسمى
تقبلي هذآ آلمرور آلمتوآضع
آخيكـ

ما شاء الله تبارك الله
ابداع × ابداع

صح لسانك ترانيم وصح لسان منيف
مافيكم حيله،،