يادبرة الله

يادبرة الله

يادبرة الله مابقى شيء ماصار
مالي على رد المقادير حيلة
يالله ياللي عالم(ن) سر وجهار
يالواحد اللي كلنا نلتجي له
تلطف بحال اللي له سنين محتار
وتشفي غليل اللي تزايد غليله
عيني تهل الدمع مدرار مدرار
وقلبي من الايام واعزتي له
اقولها وانا ادري الوقت دوار
وكل(ن) على ماقال حمله يشيله
البارحة جتني هواجيس وافكار
وشبيت انا بالشعر راس الفتيلة
ابمدح اللي ذكرهم مابعد بار
اللي لهم بالطيب سيرة طويلة
اللي لهم في صفحة المجد تذكار
اهل المراجل والشيم والفيضلة
حنى بني هويدي طويلين الاشبار
اهل الفعول الطيبة والجميلة
صغيرنا وسط الميادين مغوار
وكبيرنا لا شال شال الثقيلة
مانعرف اللي ب الشديدات خوار
ورجالنا دايم يجيب الجزيلة
تلقاء الوفاء والجود لاجيت زوار
في مجلس(ن) كل النشاما تجيله
المجلس اللي دلته بن وبهار
المجلس اللي ماتجيه الفشيلة
نعرف حقوق الضيف ونقدر الجار
والطيب فينا ماندور بديله
وربعي بني مبارك زحازيح واحرار
رجالهم بالطيب يسوى قبيله
كبيرهم عند المهمات جبار
له ضربتنٍ مثل السيوف الصقيله
عيال أبو محمد هل الطيب الأخيار
محلهم ماخاب منهو يجي له
وختامها صلو على سيد الأبرار
نبينا راعي الصفات النبيله

المصدر: الملتقى الجماهيري للشاعر محمد بن فطيس المري