بن جملا الشيخ عبدالله

بن جملا الشيخ عبدالله

ياحامل المسك فضلا سجل اعجابي
واطرح عروضك وقلي كيف اتابعها

الظاهر ان المظاهر غرت اصحابي
والواقع المر خيم في شوارعها

وانا على راحتي مستودع اتعابي
قدام تزعل وتاكل روس اصابعها

على نغم شد حيلك شدت اعصابي
واخرجت ماضي همومي من مخادعها

حاولت اغمض عيوني وارخي اهدابي.
واستنهض احلامي اللي في مهاجعها

لكن قام احتجاجي واعلن اضرابي
واسقط حبال التحفظ عن موانعها

لاالثوب ثوبي ولا الدولاب دولابي
وجهة نظر ماقدرت ارضى بواقعها

اللوم والنصح تمرضني على مابي
واسكت عن اغلاط شايفها وسامعها

شوف الزمان الموقر كيف سوا بي
وافتيك ليش الصدور يضيق واسعها

جفاف سيل العواطف جفف احبابي
وعيوني اسنت ولا جفت منابعها

بين الرضا والزعل تجري بي اسبابي
اسباب واجد ملبسها براقعها

احمل هموم العرب وهمومي اولا بي
تسرح وتضوي وترعى في مراتعها

احيان اسلم همومي راس مرقابي
عراب روحي وبوابة مواجعها

واحيان اسلم همومي راس مشعابي
واقلط على حوض مظماها واقارعها

واحيان اسوي ذكي واحيان متغابي
ثنتين تكره بعضها مير جامعها

مافيه نخوة تطيح الا على بابي
ولا فيه فزعة تقوم الا وانا معها

والله يالحيتي والله يااشنابي
مايشتكي سدها من ضعف وازعها

ثبت معلومتي في روس طلابي
واليوم اثبت نجومي في مواقعها

ذكري مسجل حضوري عند غيابي
عساه يبقى مشرف بعد اوادعها

في عقر دار الهجوس تنوخ ركابي
غصبٍ على حامي الساقة وقاطعها

هذا وانا مابعد كشرت بانيابي
ولا غزيت المعاني في مرابعها

والله لولا الزمان اللي تلوا بي
لاكحل عيون القصايد من مطالعها

ون كان مستقبلي مايحسب حسابي
والنفس ماعاد يخجلني تواضعها

مفعول درة عمر في ظهر الأعرابي
ساري على شوفة النفس ومطامعها

عبدالله مرزوق بن جملا

المصدر: الملتقى الجماهيري للشاعر محمد بن فطيس المري