خيالات وحلوم

خيالات وحلوم

السلام عليكم ورحمة الله
وبركاته

ارجو ان تنال الرضى


ياهـــــــم قلبي لابـغـــــت عيني النوم
....................................... تبي الـمـنـــــام ولايطيب الـمنـــــــامي
صدري يضـيـق اليا بدا الليل بـقـدوم
....................................... واقـوم انـادم نايحــــــــــات الحمــامي
الليل مـســــراحي على ويل وهمـــوم
....................................... يوقض نزيف الجـرح والجـــرح دامي
لانـام غيـري تســــــهـر العـين وتلوم
....................................... حض ٍ عثير ولاقـعـد واســـــــــتقامي
والقلب يـشـكي جــور الايــــام مكلوم
....................................... كنه على حد الـشــــطير الحـســــامي
والا على نـــار ٍ مواقيدهـــــــــا كـوم
....................................... يشوى بظهر الصاج والصاج حــامي
مليـت صـــبري مـابقى فيني عـــزوم
....................................... دربي طويل وســـــــاري ٍفي ظـــلامي
الحــال يرعــــــاهـــا شـقى دايم الدوم
....................................... ضاعت مثل ماضاع طعم ابتســـــامي
وجـدي على وقت ٍ تبقى له رســــــوم
....................................... لو راح من دونـــه ثلاثين عـــــــامي
اقفى ويطري لي خيــــــــالات وحلوم
....................................... مثل الـســـراب اللي ترجـــاه ضـامي
خليل قلي يابـعـــد كـل شـــــغــمــوم
....................................... ليه الزمــان الشين يهوى خصــــامي
اليا اشــتـكيت يلومني راعي اللوم
....................................... نــاري على المرتـاح برد وســــلامي
لوهـو جـــراله ماجـــــــرالي ولو يوم
....................................... يشــيـب راســـه من عناي وســـقامي
ابديت شي ٍ بين الاضـــــلاع مكـتـوم
....................................... تقـراه ناس ٍ مـادروا وش عــــــلامي
بابيــــات شـــــعر ٍ كنها الدر منظـوم
....................................... لولا عــــــذابـي مـابـدت للانـــــامي
مثل الحطب يـدفـي ســـنا نــاره القوم
....................................... لهم القصايد والحــــــريق بعـظــــامي
يالله عسى منهو بـدنـيـــــاه محــــروم
....................................... باعلى منـــــازل جنتك له مقــــــــامي
تـم الكـــلام بريحـة الـمـســك مختـوم
....................................... واقبل تحية صــاحبك والــســـــــلامي


.
.
.

ابراهيم محمد بشير العنزي

.
.
.

المصدر: الملتقى الجماهيري للشاعر محمد بن فطيس المري

وعليكم السلام ورحمة الله


لله درك ابيات رائعة ايها الشاعر


صح لسانك ولا هنت


تحيتي وتقديري

الله الله الله رووووعه وابداع وتمكن وجزاله ماالله عليك ارحب فيك وابداعك الراقي صح لسانك شاعرنا العنزي

اقتباس:
المشاركة الأصلية كتبت بواسطة لولوه المري [فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

وعليكم السلام ورحمة الله

لله درك ابيات رائعة ايها الشاعر

صح لسانك ولا هنت

تحيتي وتقديري

اشكرك اختى لولوه المري

على مرورك الرائع

صح ابدانك وتسلم الايادي

اقتباس:
المشاركة الأصلية كتبت بواسطة موسى ابومشهور [فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]
الله الله الله رووووعه وابداع وتمكن وجزاله ماالله عليك ارحب فيك وابداعك الراقي صح لسانك شاعرنا العنزي



صح ابدانك اخوي موسى

وشكرا ً لمرورك العطر والاطراء الجميل

لاهنت ياالغالي

لك كل التقدير

اخوي الغالي الشاعر ابراهيم محمد العنزي

اتحفتنا بهذه الابيات الرائعة التي فيها الكثير من

المعاناة والمرارة ولكن هذا لا ينقص من جمالها

دمت ودام متألق ودام لنا مداد قلمك

تقديري واعجابي اخوي الغالي

اخوي علي المحوري

ياهلا ومرحبا بك وبحضورك الرائع

اشكرك لتواجدك الذي شرفني

لك كل الموده والتقدير

و

دمت في امان

صح لسانك يابن وايل