هنا الشعر الحقيقي ياشعراء وأعضاء وزوار ملتقى ابن فطيس

هنا الشعر الحقيقي ياشعراء وأعضاء وزوار ملتقى ابن فطيس

السلام عليكم ورحمة الله وبركاته

معلقه شعريه ملئيه بالوصف والحكم والمواعظ والمعاني الثمينه ,,

التي لايجيدها غير الشاعر عبدالله بن عون

وأنا هنا ولحبي للشاعر الكبير عبدالله بن نايف إبن عون العتيبي اطال الله في عمره ..

ولشدة تعلقي بقصيدته هذه ولتفردها بين كل القصائد أخترتها ومنذ زمن لتكون الشيخه ..
على الأقل بالنسبة لي ..

ولو لم يكتب أبن عون الا هذه القصيده لأكفته شعراً وكذالك لو لم يقراءو هوات الشعر

الا هذه القصيده لأكفتهم واشبعت ذائقتهم الشعريه الى الأبد ...

وأنا شخصياً يكفيني فخر أنني احفظها كامله من أول بيت الى أخر بيت



إليكم القصيده .. وأتمنى أن توافقوني الرأي بتفرد هذه القصيده بلقب الشيخه ..

مع هجعة اللي يختفـون أول الليـل=الغايبـه دايـم يغيـبـون معـهـا
النفـس تاقـت للسمـر والتعاليـل=والعين أشوف النوم خالف سنعهـا
وطاب الجلوس بجانب النار ياشعيل=وحط الحطب في ترعة ٍ من ترعها
وإليا استوى للجمر فيهـا دحاميـل=وأقبـل تواهجهـا وقفـى ولعهـا
درج على المحماس من غير تعجيل=بريـة ٍ دوب اليمـانـي قطعـهـا
أول قطاف سفـوح شـم الأقاذيـل=اللي جذا حوم الوحش عن فرعهـا
شـم يساقيـه السحـاب بهماليـل=ليـن يتحـدر سيلهـا مـع تلعهـا
وترى لحمستهـا نظـام ودواليـل=وشريعة يمشى بأثر مـن شرعهـا
أول بدايتهـا مـدافـع مخالـيـل=ومسرى جماميـل ٍ بغالـي سلعهـا
وسوق ٍ كما سوق الجمال المحاميل=مازال حمـو النـار ماقـد لذعهـا
وإليا تطلق مـن شذاهـا زعاجيـل=وبشت عرق واللون الأشقر نشعهـا
فالحال سهلها عـن النـار تسهيـل=حتى لظى المحماس مـا يدّرعهـا
وغير لها ياشعيل مسرى الجماميـل=بطـراد زلبـات ٍ تزايـد فزعهـا
تدريجة الحيران ومطـارد الخيـل=هـذي طريقـة حمسهـا واتبعهـا
وعقبه تميلها علـى النجـر تمييـل=جذاب روس القوم مـن منتجعهـا
عوايد له من على سالـف الجيـل=ماهـي حديثـه تونـا نبتدعـهـا
ومن يوم تنعمها فـدوك الدعابيـل=فوق أصهب اللون الربيب تهزعهـا
وتضبط قياس الماء لها بالمكاييـل=ضبط الخبير لصنعـة ٍ مخترعهـا
ومن يوم تقطع خلها مثل مـا قيـل=ترخي على هدفا السبيـل مخذعهـا
مبهارة ٍ تذعـر بغالـي التشاكيـل=طب العمـاس إليـا تيسـر تبعهـا
صفرا كما القنديل حسنـا تعازيـل=من صنعة الرسلان الأول صنعهـا
لا دارها اللـي يعتنـي بالمعاميـل=وفاحت وبالفنجـال الأول ردعهـا
وفيها تساوت خنـة البـن والهيـل=والنفـس دافعهـا عليهـا دفعـهـا
قم صب لي ياشعيل منهـا فناجيـل=على سنا ضـوء تهـادى ولعهـا
أظنهـا يامـال طـول التماهيـل=تقلع همومـي كـان ربـي قلعهـا
وتفتح لها أبواب بصدري مقافيـل=وتجمع لي أفكار ٍ تشتـت ضيعهـا
وآخذ بها عن ضيقة البـال تبديـل=وصروف دنيا ما مشت مع سنعهـا
دنيا تصيـد بالشبـك والمحابيـل=نـاس تسايرهـا ونـاس تخدعهـا
أحد تجي له بالرضـا والتساهيـل=وهو لو تعب في جمعها ما جمعهـا
وأحـد ركابـه مقفيـات ٍ مقابيـل=ولابـاب والا نافـذة مـا قرعهـا
وتعطيه قاف إليا طمع بالمواصيـل=وينكف معيف وسامح ٍ من طمعهـا
دنيـا تقـذل سبـق الحـر تقذيـل=وتوهنه في ربعـة ٍ مـن ربعهـا
لو قد مضى له من شقاها غرابيـل=يوم الحرايـب مظلمـات ٍ قطعهـا
يوم الطلوع ابها على الهجن والخيل=ما قد فهق عن طلعت ٍ مـا طلعهـا
ويوم استقرت وأغدقت بالمحاصيل=صارت منافعهـا لمـن لا نفعهـا
عقبانهـا تمسـي قوايـا مواجيـل=والمستفيـد غرابهـا مـع مرعهـا
واللي مسار أمورهـم بالبراطيـل=واللي متى ما وافقـت لـه بلعهـا
ومن ذاق در المرزمات الأباهيـل=أمـا حلبهـا حلـب وإلا رضعهـا
وحصنيها يرقص على هزت الذيل=ولو يجتمع قدمـه سبـاع ٍ سبعهـا
ولا عندنا ياشعيل للعـوج تعديـل=مازال ممشاها على العـدل أطعهـا
وإن شفتها قامت تجانف على الميل=بأردى ثمن عند أول السـوم بعهـا
واستثن منها قومت ٍ بآخـر الليـل=في حـزة ٍ كـل ٍ يحـب يهجعهـا
إليا جاء لثلث الليل الآخر تراتيـل=وقامت ملائكة الرضا قمت معهـا
فـي ساعـة ٍ تكبيرهـا والتهاليـل=يجنى ثمار عذوقها مـن زرعهـا
وخل اجتماعك بالرجال الحلاحيـل=اللـي خيـار المجتمـع مجتمعهـا
ولا تبدي الشكوى ولو ضامك الشيل=الا علـى رجـل يحـس بوجعهـا
رجل إليا التفـت عليـك النشابيـل=أمـا شبرهـا شبـر وإلا ذرعهـا
واختار مفتـاح ٍ للأريـا المقافيـل=روس العلا يرقيك فـي مرتفعهـا
ومن الزمان اخذ العبر بالرحاحيـل=اللـي منازلهـم تهـاوى بقعـهـا
يافجعتي لاجيت بعـض المداهيـل=ولا شفت فيها عقب حـي ٍ رتعهـا
إلا رسـوم دارسـات ٍ مسامـيـل=وخرايم ٍ يزمى السـراب بشمعهـا
بلاقع ٍ شهـب ٍ تهـاوى زهاليـل=ألظّاهر أن اللـي فجعنـي فجعهـا
من عقب أهلها لو سقتها المخاييـل=مالله نفعهـا وبركتـهـا نزعـهـا
لاجيتها جضيت مـن قلـة الحيـل=ودنياي عندي ضاق بـي متسعهـا
على حلاحيـل تضـد الرجاجيـل=حصن ٍ ماعـاد إلامقالـع شيعهـا
الستـه اللـي يستحقـون تفضيـل=النفس وين أرضٍ بعدهـم تسعهـا
عاشوا على الدنيا كما رافـد النيـل=بنفوس ما سيطـر عليهـا جشعهـا
ولا قلت قولٍ مامعي منـه تذبيـل=يا مذيعها للنـاس اخذهـا وأذعهـا
وحق القبايل ما أعترض له بتقليـل=الناس ما أظلمها ولا أنقص وزعها
فيهـم مشاكيـلٍ وفينـا مشاكيـل=ياما مـن الأخيـار معنـا ومعهـا

وسلامتكم ..




.

المصدر: الملتقى الجماهيري للشاعر محمد بن فطيس المري

صح السان ابن عوون وسلمت يد الناقل المبدع في حضوره
احلى ++++تقييم

تسلم خيو ووووووو
تقيمي

اقتباس:
المشاركة الأصلية كتبت بواسطة روعة الاحساس [فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]
صح السان ابن عوون وسلمت يد الناقل المبدع في حضوره
احلى ++++تقييم



الله يسلمك ويعافيك ياروعه

الابداع مرورك طال عمرك

اقتباس:
المشاركة الأصلية كتبت بواسطة ريف الصبا [فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]
تسلم خيو ووووووو
تقيمي




الله يسلمك ويعافيك ياريف الصبا

مرورك بحد ذاته تقييم طال عمرك

الله يصح لسان ابو نايف وابو نايف كل قصايده بالنسبه لي معلقااات

عز الله اني احب قصااايده كلها يطربك قصيده سواء المقروء والمسموع


وسلمت يا فزااع وبيض الله وجهك

آلـَُلـٌّہَ يعطيك العافيه ابدعت فـِ♡ـيْ انتقاء القصيده
ودي

اقتباس:
المشاركة الأصلية كتبت بواسطة محمد بن عبدالهادي المري [فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]
الله يصح لسان ابو نايف وابو نايف كل قصايده بالنسبه لي معلقااات

عز الله اني احب قصااايده كلها يطربك قصيده سواء المقروء والمسموع


وسلمت يا فزااع وبيض الله وجهك




صح كلك يالمري بالنيابه

والله يسلمك ويعافيك

وجهك ابيض لاعدمناك

.

اقتباس:
المشاركة الأصلية كتبت بواسطة *༩ྀ آلـــــزيـــــن *༩ྀ* [فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]
آلـَُلـٌّہَ يعطيك العافيه ابدعت فـِ♡ـيْ انتقاء القصيده
ودي




الله يعافيك ويسلمك يالزين

الابداع مرورك طال عمرك

صـح ألسـانكـ ولكـ مني أحلـى تقيــم