اغنى رجل فالعالم

اغنى رجل فالعالم

.
.
.
يا مزنة هلت مدامعها بلا برق ورعد
اعشوشبت منها الفياض ولبست الوان الزهور

ليا بكر الوسمي لنا فيها مع الغالي وعد
تضحك لنا القمرا وتغمرنا السعادة والحبور

نبعد عن الروتين والضوضاء وعمران البلد
ما نسمع الا همسة النسمة وتسبيح الطيور

النفس تأخذ كل راحتها ويرتاح الجسد
وتهدي لنا ازهار الخزامى والنفل اجمل عطور

نفحة من الجو اللطيف ترجع الشايب ولد
من قال نفحات الصحاري مثل تكييف القصور؟

اذا نويت اخرج من همومي وابددها بدد
خرجت عن صوت الشوارع واختناقات المرور

مع ديرة ممطورة فيها نظر عيني جرد
وجلست في روض يغذي نبته الوبل الطهور

ما فوقي الا القبه اللي رفعت بليا عمد
تشكلت فيها نجوم الليل تعط الارض نور

الوقت ما يرحمني اهمومه وحبله مسد
واحاول اقفز فوق الانفاق الكئيبة والجسور

انا بدوي قلبي اقسى من حصى شمرخ واشد
والين من الديباج في بعض المواقف والامور

احبابي اكثر من شعر راسي وحسادي بعد
فسر تعابير الوجيه وتعرف اسرار الصدور

طال المدى والسبت يأخذ بعض ساعات الاحد
والليل في رأس النهار عنان والساعة تدور

يصفي من ايام السنة يومين والباقي عدد
يوم اجتماع الطيبين ويوم تجبير الكسور

واغنى رجل فـ العالم اللي ما شكى همه لاحد
الا لمن يملك مفاتيح الاجابه والسرور

-
.
#شعر
فيصل بن منصور الرياحي البقمي

.
.

المصدر: الملتقى الجماهيري للشاعر محمد بن فطيس المري

صح الله لسان شاعرها
وتسلم ع النقل *رشيد*

سلمك الله وحفظك يا ريف