بصمة

بصمة

الليل طرف والسهر بين الاحداق
والصبح حلم البارحة ما ضوابه

ليل السهر يا معذبي تو,, ما فاق
من,, سكرته,, من,, غفلته من عذابه

ما دام حتى احلامنا البيض تنعاق
عنا,, وش اللي,, عاد باقي نهابه

لم الورق لا ينكشف سر الأوراق
ما تشبع الاوراق جوع الكتابة

ولا تبرد الونة لهب حر الاشواق
لا (ون) مجروح النوى,, زاد مابه

ولا ينفع الولهان ترديد مشتاق
ان ما شرب صافي زلال وروابه

عذر الندم ما يشرح الصدر لا ضاق
كم يجرح العزف الحزين الربابة

لاجرها المحزون من حر ما ذاق
تصرم قلوب,, وتفتق هضابه

وانا ادري انك مرهف احساس واخلاق
مر الهوى قلبك وهجيت بابه

اللي قريته كفنه وسط الاعماق
خل السؤال يموت,, موته,, إجابة

يا اطهر وصال نهايته كانت افراق
طهر الوصال اللي بداه,, انتها به

الصبر مر وبعض الاحيان ينذاق
كم علقم كان الشفاء من شرابه

اصبر وخل,, الحل,, بيدين خلاق
الله كريم ولا يخيب الرجابه

والبعد موجع والسفر هم وارهاق
واللي يحبك درب وصلك مشا به

الله وامانه,, كل ما ناض براق
ضميت طيفك والخفوق احتفابه

وسقت المشاعر والغلا جاك منساق
مثل القراح العذب,, مثل (السحابة)

لا أرخت ذوايبها لوت كل الاعناق
تخيلها شوق,, وشموخ,, ومهابة

لولا,, اختلاف,, اذواق,, وأذواق,, واذواق
ما شفتك اجمل من جرحني عتابه

يا اعذب,, وارق من الندى عند الاشراق
والطف من النسناس لاسرج ركابه

تدري وش اللي.؟,, محرق قلبي احراق.؟
انك بعيد,, وحزن,, الايام غابة
-
.
.
#شعر
عاقل الزيد رحمة الله
.
.

المصدر: الملتقى الجماهيري للشاعر محمد بن فطيس المري

وعليكم السلام ورحمة الله

قصيده جميله ومعبره جدا
ورحمة الله على شاعرها
راقت لي ابياتها كلها
ومشكور استاذ ساهر على ذوقك وجهودك ..

تحياتي وتقديري .

سلمك الله وحفظك يا بلقيس
-
رشيد