لا تنحني قدم البشر تشكـي الحـال

لا تنحني قدم البشر تشكـي الحـال

***



انسى الكدر واصعد على نايف الجال
وادعس على راس الكسل بالعزيمه

لا تنحني قدم البشر تشكـي الحـال
المجـد يغـزى مايقـدم وليـمـه

مافيه مجد إلا ورى ساسه ابطـال
ولافيـه ذلـه ماورهـا هزيمـه

افصخ جلابيب الحيا لااسود الشـال
العز في طـرد الطمـوح ونعيمـه

ماقاودت لأهل السطر طيب الافعال
ماريضوهـا إلا بشـد الشكيـمـه

لولا المراجـل ماسمعنـا برجـال
ولولا الفضيحه ماعرفنا الحشيمـه

من كان ماهو عند الافعـال فعـال
يفعل به الوقت الـردي مايضيمـه

والشجره اللي مالها طلـع وظـلال
يمرهـا الحطـاب بكـره هشيمـه

وبيض القلوب بهالزمن مالها فـال
لاصـار ماتملـك عقـول حكيمـه

واللاش مايرفاك عن سو الاعمـال
لاطحت قنعـك الخنـا والشتيمـه

واهل المصالح حدها حد الاشغـال
اللي قضى شغله يـذب الخريمـه

رحلة مصالح وارتزاق وثرا مـال
من طاح ماهو في يديـنٍ رحيمـه

خلك مع المحتال صاطي ومحتـال
وخلك مع الكفو الصتيمه صتيمـه

ولا تقيس الناس دايـم بالاشكـال
بعض المظاهر روس اهلها سقيمه

الفـرق ماهـو بالتكاثربالامـوال
الفرق في ميز العقـول السليمـه

المصدر: الملتقى الجماهيري للشاعر محمد بن فطيس المري