.. 6 ابيات وسبب كتابتها ..

.. 6 ابيات وسبب كتابتها ..

انا منكم وفيكم .. وحبيت ابين لكم اكثر ما يحزنني كلمة شايب يعتبرني مثل ولده .. واول ما خلصت الثانويه وبنسبه .. كان هو والعالم يشوفون المستقبل قدامي ولكن دار الوقت واتبدلت الاحوال ومرت السنين ومسكني بعد صلاة المغرب ، وقال لي بالمختصر اني تغيرت ولا فيه هدف واضح قدام عيني وذاك المستقبل اللي توقعه لي ، غيّر النظر فيه ويقول الحين بسالك انت وش حلمك وش هدفك في الحياه بس سربته .. هال 6 ابيات قلتها ولا اعدت النظر فيها ولا غيرتها لانها طلعت مني بسرعه ورد على كلام " ابو فهد " في وقتها ، حتى لو كان فيه شي يحتاج تعديل ..
انا ما طرحت هالموضوع لاني ابي تقييم للقصيده ولكن لمشاركتي اكثر ما حز في خاطري , وللحين كلامه في مسمعي .. قلت له

اليـا ذكـرت احلام عمري من اسـنين = ضاقـت بـي الدنيـا على كل الاجنـآب
يـومي صغير وباني اقصور من طين = وآقول هذا لي وهذا للاقـراب
واليوم صار العمر واحد وعشرين = وصكّات بقعا واقفه تطرق الباب
واشوف حلمي كان ما بين قوسين = مـغير قصـرن قد بنيته من تراب
يا بو فهد والجرح ما له مداوين = واظن مثلك خابـرن ويـش الاسباب
ولا تنشد المهموم وش حلمه الحين = ما ينفعه ذكره ورآس الامل شاب

ولا قال الا .. افلح عسى الله يهديك ويوفقك وراح .. الله يطول بعمره

ومثل ما قلت انا بس حبيت اشارككم اكثر ما يحز في خاطري , بغض النظر عن قوة الابيات

المصدر: الملتقى الجماهيري للشاعر محمد بن فطيس المري

ولا تنشد المهموم وش حلمه الحيـن

ما ينفعه ذكره ورآس الامل شـاب

الله الله الله

والله قمه ياحمد ابيات جزله وجازت لي بالحيل صح الله لسانك مليووون

بيض الله وجهك ياخوي ..
والشكوى لله ,,

ولا هنت على متابعتك في كل جديد ، و رايك اللي ما لنا غنى عنه

صح الله السانك واعذب القصصاائد والتي يبقلى لها روحها الشعري هي التي تأتي وليدت الحدث مبــاشره

استمعت بقرائتهااا

صح الله بدنك اخوي سمو المراجل .. والحمدلله انها نالت على استحسانكم

مافيك حيله ياحمد واجمل الشعر اصدقه

افلح الله يوفقك

هلا وغلا حمد
والله القصيده مره حلوه وأنا أختك
وأنا قلت من أول
قصيده قريتها لك
نضمها وحبكها كله يعجبني
ماشاء الله عليك
الله يحفظك

!,
طرح رائع بكل ابعادة ومضمونه
سلمت اناملك على هذا النثر الأكثر من رائع
دام الابداع والتميز يعانق سطورك
اطلالتي
/

اقتباس المشاركة الأصلية كتبت بواسطة سلطان المري مافيك حيله ياحمد واجمل الشعر اصدقه افلح الله يوفقك

بيض الله وجهك ..
والله يجعلنا من المفلحين ومن يسمع

اقتباس المشاركة الأصلية كتبت بواسطة الماس هلا وغلا حمد والله القصيده مره حلوه وأنا أختك وأنا قلت من أول قصيده قريتها لك نضمها وحبكها كله يعجبني ماشاء الله عليك الله يحفظك

تسلمين وما قصرتي على الكلام الذوق
وان شاءالله انقدم كل ما يعجبج