الشعر هم وصاحب الشعر مهموم = أقولها حكمة ولا هي لقافة

أقولها دايم مهو بأمس واليوم = بيني وبين لحون شعري وقافة

واليوم بأعلنها وبأستحمل اللّوم = من شاعرٍ توّه ما ذاق الحسافة

الشاعر اللّي همّه يسجّل ألبوم = يمّا سمان الهرج والّا ضعافه

الشعر عنده لعب ومزوح وحلوم = وألّا حروفٍ تنكتب في صحافة

مآ هو بمن دنيا الغرابيل مظيوم = والهم مآ عمره مع الوقت شافه

يآهيه يا طير عجل شفّه الحوم = قبل المطير أحسب حساب المسافه

لآ تكلّف العربان وتشرّه القوم = كلٍّ عرف وش مقدمه من خلافه

أحدٍ جفى وأحدٍ نظر نظرة الشوم = والبيت ما كلٍّ سعى به وطافه

بحرك عميق وعادك بحاجة العوم = وتقول أنا الغطّاس وأنته تخافه

إن كان ما الشعر أحرمك لذّة النوم = وألّا يآ شين الفلسفة والكلافة