يانديبـي فـوق منبـوز الفقـاره
آركـى و حبـال كـوره كالفاتـي
آركى يرعـى نواويـر القفـاره
ما علاه الشد من عشر سنواتـي
كن في عينه من الفرقى شـراره
أو مخاليب الوحـوش الطايراتـي
جعل ضلع طويق ياعايض و وداره
جعل يمحـل والوشـوم مربعاتـي
حيث ينزل عندنا مظعـون سـاره
واهتني بصويحبي عشر سنواتـي
ولعتني بالهـوى والحـب سـاره
ولعتنـي عـن غناديـر البناتـي
ماخبر جار ذبـح بالحـب جـاره
بالمبيسـم والثنايـا المرهفاتـي
راس ساره ذيل شقرا وسط غاره
والجدايـل بالرشـوش مجدلاتـي
والثنايـا قحويـان فـي زبــاره
علها الوسمي على حـد النباتـي
ريق ساره مثل سكر في غضـاره
أو حليب بكار عـرب مسمناتـي
والنهيد زبيدي فـي دعـب قـاره
في محير الماء القراح مصلعاتـي
والمطوع لو يشوف خديد سـاره
ضيع المكتوب وعجل بالصلاتـي
يا وجودي وجد مكسور الجبـاره
ساهرتسعيـن ليلـه مـا يباتـي
أو وجود اللي فضى الحاكم ديـاره
وخـذ مالـه والحريـم مسلباتـي
عقب ما هو تاجر راعي عمـاره
صار صعلـوك علومـه هيناتـي
لا يمي يعطى حنيش فـي خبـاره
سمها يشظى العظـام الصالباتـي
حالف مااسلى ولا انسى حب ساره
كود أهل شقراء يخلون الصلاتـي
لارمانـي لايميـن ولا يـسـاره
مـار صوبنـي بحـد المرهفاتـي
حطني لهل الهوى المجمول شاره
مثل نيشـان المعاطيـب الرماتـي
.gif "s17")
