حسبي الله من تعمّد في جفاه=قلبي اللي من سبب هجرهْ ينوح
ودّي انسى.. مير قلبي مانساه=عارفٍ قلبي على الذكرى لحوح
ماتصدق! كلّ هذا ماكفاه=حتى وصلهْ بالحلم خلّي شحوح
ولوّ طيفهْ مرةٍ بيّن حلاه=ماهو شوقٍ..؟ جا يمـلّحْها الجروح
آه وا ويلاه خلّي يا قساه=مادرى وسط الحنايا لهْ صروح
غيّروه الناس وابعدْ في خطاه=مهرتي عن سكـّتي صارت جموح
بالمكان اللي يعانـقـنـي هواه=صرت انادي اسمهْ بصوتٍ بحوح
آتلـفـّت مامعي الاّ مناه=ارتجي علّ وعسى زوله يلوح
صرت اسولف للسحايب عن غلاه=يوم رجلي عانقتْ هام السفوح
قلبي بير وكاشفٍ عنّه غطاه=يوم فارقني وانا هجسي يبــوح
من ورا زحمتْ شقاوي محتواه=ماتت آمال الهواوي والطموح
ربي عين المبتلي عَمّا بلاه =كنت احسب السالفه كانت مزوح
في غيابهْ كل صباحاتي مساه= اسهرهْ ماشفت من شمسهْ وضوح
كلمةٍ مسجونةٍ خلف الشفاه=خبـّروه انّي على وصلهْ نصوح
يلعن الشيطان ويجدد ولاه=ويدمج الجثمان مثل اول بروح
وانْ تمادى في عناي وفي جفاه=والله انسى صاحب الوجه السموح
واقطعْ الشريان من قلبٍ طراه=واترك الدمـّان من صدري نضوح
حسبي الله من تـعـمــّد في شقاه=قلبي اللي كل مساحاتهْ جروح

المصدر: الملتقى الجماهيري للشاعر محمد بن فطيس المري