يا مروق الكيف يا اللى تبــهر ادلالك
فنجان رايق على ما تشتهي سوّه
ودي اضم الضحى بعيون فنجـــالك
ودي أرده عن الغيبــــــــات بمروّه
ودي اطفي سمـــوم القيض بظلالك
ودي اعدي طريــــــــق منقطع نوّه
يا ضاحي أيام عمري ماتت أجيالك
رح وانـــــتحي أو يردك عيد في جوّه
اللى عطاك الهوى مشفق على حالك
رماك في شعب ممحل موحشن دوّه
حيث الهوى لو تجيله ما تهيالك
يكذب عليك وتصـــــــدق بايق الخوّه
يا اللى سريت الليالي مالي ومالك
وش لي مع الساري اللى منعمي ضوّه
يا اللى على غير قادي طال مدهالك
يا اللى وطيت الهفا لاعــــــــاد تتفوّه
يكفيك راع الهوى مشتاق ما جالك
قم قبل يبرد عليك الجـــــــرح قم كوّه
الصدق يا الصدق يا مطولهن احبالك
جاك الضعيف ورجع من عندك بقوّه
لاتستر بالهوى ما يبرر افعـــالك
ثوب العرى ما ستر رجــــال بس طوّه
وهم الخلوج الموالف خله ابالك
ميت ولدهــــــا وهي تعطف على بوّه
الكذب لا خالط الصدق وتعنالك
يبان وجه الحقــــــــــايق فيك متشوّه
يا اللى بلاك الهوى خذ رد مرسالك
محدن صـــــــلح للهوى لانته ولاهوّه
ارقا على ما نسيته قبل يرقالك
ون يسألوك الهوى قول ابتعد توّه
الشاعر عيد الحويطي (ابومانع)
