أزور معواده من العام للعام=واكتب على الجدران تاريخ فرقاه
اخطّ هاجوسي على صرح الاحلام=واعيد رسمه .. خوفي الوقت يمحاه
عساه لـَى مرّت بذكراي الانسام=يذكر مواعيده ويرجع ويقراه
وترجع به اشواقه على ذيك الايّام=واسمع تناهيده بقلبي .. ورجواه
من عقب هجره صرت شاعر ورسّام=ارسم وصوف الفَقْد ياسٍ على الآه
تسبق ظنوني حثّ قلبي للاقدام=أمشي على عشبٍ نبت وسط ممشاه
أجلس مكانه وانطوي فيه وآنام=والعمر ينساني على هيف ذكراه
القلب طيرٍ فوق مشقيه .. حوّام=ما فارَقَهْ من يوم لوّح بيمناه

المصدر: الملتقى الجماهيري للشاعر محمد بن فطيس المري