( هذه القصيدة اهداء للشاعر المتميز / محمد بن فطيس المري صاحب الذوق الرفيع والكلمه الصادقة الشاعر والفارس والصقار شاعر المليون " المحيط الهادي" اتمنى انا تنال استحسانه وشئياً من ذائقته الشعرية )
يامحمد بن فطيس مسيت بالخير
ياساكن الدوحة بياصل سلامي
سلام يامحمد تحيه وتقدير
يشهد على صدق النوايا كلامي
ارسلتها عبر التواصل بتقرير
وحثيها قلت الهمام الهمامي
تنصاك يالمشهور ضمن المشاهير
الشهره اللي مع كبار الاسامي
شاعر ولد شاعر وجيهٍ مسافير
معرب الجدين خال وعمامي
عزالله انك تصخر القاف تصخير
يمناك يمنى ياسهيل اليماني
تغرف بحر تقطف زهور ونواوير
تنحت صخر مايلحقونك ملامي
لو الشعر تعليم شفت الطوابير
وقوفاً على بابك سواة الحيامي
ولو الشعر يهدى عطيت المسايير
اللي يجونك يامحمد احشامي
يا ما بنيت من الذهب والدنانير
بيوتٍ حفظها اللي بسن الفطامي
اثقل على الشعار من سالم الزير
غيرك يبا الناموس والكبد ظامي
والا انت يابن فطيس في وقتنا غير
واللي يبا يجاريك يحلم حلامي
افحمتهم مابين ورد ومصادير
ما يجهلونك فا اللزز والزحامي
وليا شهر قافك مثل شهرة الطير
تهابه العقبان حرٍ اقطامي
يشكي عليك الشعرمن شعر تضيير
يمصعونه مثل مصع الثمامي
كثروا علينا في زمنا الشواعير
ياكثرهم كثر الجراد التهامي
شاعر على المعنى يجيد التعابير
وشاعر على ماقيل برد وسلامي
وشاعر يصورها على الكيف تصوير
وشاعر يبط كبود ناسٍ افهامي
وشاعر يصيح وكن صدره دوافير
من حر مابه دايم الدم حامي
وشاعر براسه شيءٍ من السعاطير
يقول انا اللي ماتراخى حزامي
وليا نصيت مدورين المعاذير
عذرتهم في كل وقت ومقامي
وحنا تعبنا من العنا والمشاوير
وظروفنا احيان ماهي تمامي
وختامها يابن الرجال المناعير
جيرتها باسمك وفيها احترامي
( مرزوق العصيمي )
