انا موجه للسناني بيت

انا موجه للسناني بيت

يا عين بثي بالتحيه والوقار بلا ثمن
لاهل الوفى والجاه واختصي عزيزين الجناب

ما دامت الانفاس في جوفي لعب فيها الزمن
خلي من صروح المعالي مدهل لكل اضطراب

النور لو فارق عيون الشوق ما غير الوطن
يرضي هوا المشتاق لو كان الهوا ماله حساب

انا موجه للسناني بيت معناه استكن
في جوف صدري لين معلوقه من الحرمان ذاب

قل لي وش اخبار العرب من بعد صدمات الفتن
وايضا ظروف بخيت جبها وانثر حروف الجواب

انا الخوي اللي بعثه الله من غب المحن
وانا الرفيق اللي كسا التعبير من صمت العتاب

وانا معك في كل موقف يا رفيقي لن ولن
ارضى سوا باللي رضيتو به ولو ضاع الزهاب

فاذا عرفت اكون يا عبد الله من الناس من
عطني جوابك لا تردد دام لك قدرٍ مهاب

انت الذي بروزت بعيوني من المعنى لحن
وانت الذي سلهمت باطراف الحكي والراس شاب

بلغ بخيت افضل تحياتي وقل له ما سكن
جرح الليالي الماضيه حتى به الوجدان طاب

امسى يعوث بداخل الوجدان حتى انه مكن
ما بين تفسيرات معنى القول ولعاب الصواب

رفيقك اللي من زمان اشتاق وعيونه بكن
في جوف يوكوهام يتمنى جناحين السحاب

انزاح من ضيمه شوي وزاد به سقم البدن
حتى غدا مثل العصا يمشي ومشيه باكتآب

ان مر طاري ديرته جسمه بقاعه ما اتزن
وان مر طاري خوته يشكي من انواع العذاب

ارجوك يا عبدالله الحقني ترا العمر اندفن
ترا جوابك يبعث النشوه علي من كل باب

قلبي معك وزمام قلبي في يدينك والرسن
قل لي وش اخبار العرب قل لي وش اخبار الرحاب

قل لي وقل لي كل ما مريت من وادي قطن
هل عاد به للصيد ماريه ام ان الصيد غاب

هذي رساله من بلاد الخارج لقلب الوطن
صوب السناني مالها غيره من الناس احتساب

المصدر: الملتقى الجماهيري للشاعر محمد بن فطيس المري