كن نضم حروفها عقدن بعنق الياسميه ....؟

[سنيد القعياني]

السسسسلام عليكم ورحمة الله وبركاته ...






والله ان النخوه اللي وجهة منها إليه
.......... جددت عندي جروحِن عاجزن مالقى دواها
يوم جتني تنتخي ما باقي إلا الهاشميه
.......... وادري اني من وراء النخوه واطوح من وراها
وادري اني حافظن كل الحروف الابجديه
.......... وادري ان النفس ماخذتن من الدنيا كفاها
كيف تكفى ماتهز عروشنا يالاجوديه
.......... وكيف مثلك يطلب الحاجه ولا يلقى قضاها
من رجالن وافتخر في مجدها يالحاتميه
.......... بس هالدنيا يكفي من عرفها ماغواها
تزدحم فيها الاصايل بين شمس وبين فيه
.......... والله اني مسرجن خيل الصحابه في قراها
والله ان البخل تقصر خطوته ماجات ليه
.......... بس وين العذر عنا ماعذرنا من بغاها
التفت لبيضها لقيت جردن جرهديه
.......... والتفت لسودها قامت ولقتني قفاها
واعتزيت بمابقى في خاطري من شاعريه
.......... واقبلت يمي تبختر تطلب الليل وضواها
يوم جات بعنفوان الكبرياء والعنجهيه
.......... واستباحت كل حرفن لين لحفته رداها
كن نضم حروفها عقدن بعنق الياسميه
.......... بنت شيخن شايمه كلن يبي يكسب رضاها







كنت اقتصد مما لدي من شعر واحب الاحتفاظ به لكن تقييمكم لي جعلني احب ان ابوح بما لدي من قصائد



مع الشكر والتقدير لكم اخوتي ...

 

 

 

 

 

 

 

 

توقيع : سنيد القعياني

ماإن ندمت على السكوت مرة , ولكني ندمت على الكلام مرارا !!