طهور ياحظي ومليون لاباس - الملتقى الجماهيري للشاعر محمد بن فطيس المري

#1 03-22-2012, 09:06 AM

يالله ياللي تجلي الهم والياس
يالواحد اللي عالم بكل طاري

أعوذ بك من كل وسواس خناس
يوسوس بصدري ليا جيت ساري

البارحة سجيت مع كم هوجاس
في ليله والنوم ماله طواري

ادعي لناس واتحسب على ناس
حشمتهم اقصت حشمتي واعتباري

كنت احسب ان الهرج للطيب مقياس
وأشوف كل الناس واحد اثاري

الناس واحد لكن العرق دساس
يكشف لك أصناف اللحى بالمواري

فإن جيت بتراهن فراهن على راس
ضاري ولا جت ساعة الجد ضاري

شف مدحك ليا صار ماهو على ساس
مثل الشهادة في عيون انتحاري

طهور ياحظي ومليون لاباس
دام الخطا من هقوتي واختياري

عفت الرفيق اللي مثل باقي الناس
اللي ليا طاب الفعل مايجاري

ودرب الغرام اللي بلا طهر واحساس
سر يخص اثنين والكل داري

فيه البنات اللي مثل حب الألماس
ماهم جواري بس مثل الجواري

اليا ضعف ايمان وازداد الافلاس
ياما شرف ينباع لحساب جاري

في مجتمع صنفين مترف ومحتاس
وهذا ماهو عن حال هذاك داري

ذا من صباح الله ورى القوت عساس
وهذا خلقه الله يقوم العصاري

وأنا ذبح صدري كثر حبس الأنفاس
برتاح من صبري وأسوق اعتذاري

ابعتذر لي عن خطا حشمه أجناس
حشمتهم اقصت حشمتي واعتباري

إلى متى وانا اصفق اخماس بأسداس
حتى يميني اشتكت من يساري

طهور ياحظي ومليون لاباس
انا الخطا من هقوتي واختياري

المصدر: الملتقى الجماهيري للشاعر محمد بن فطيس المري

الذين يشاهدون محتوى الموضوع الآن : 1 ( الأعضاء 0 والزوار 1)