عبدالله السناني + محمد الشريف

انا مابديت هذي المحاوره الا انا خاسل يدي من محمد بالصراحه
, وحكموها مثل ماتبون ,

انسان جيته وقلت له يامحمد انا ماعرف ناصر , ماصدقني
بعدين حلفت له بالله اني ماعرف ناصر ولا لي عليه طريق


ويقول لاتحلف , عاد انتم حكموها , الانسان اللي تحلف له بالله ويكذبك , كيف ترضيه ؟؟؟؟؟؟؟؟؟


ياخوي بالمحاكم , على قضايا ارقاب , إذا مافيه دليل يحلفونك , وتخرج
وانت احلف لك اني ماعرف ناصر وتقول لآتحلف ؟؟


وش حادني على الحلف , والله ياخوي لو كنت اكذب ماحلفت لك لو تطير

محاورتي يمحمد مع اخوي عبدالله
كان معناها واضح

الاخ عبدالله كان له عتب علي في مهمة الاشراف
وانا وضحت له انني اوازن الامور واعطي كثير من الناس حقها حتى لو على نفسي بعض الاحيان
واخذنا في الفتل والنقض على هذا المعنى...
ولم نتطرق لاحد لا بخير ولا بشر...
بل كان محور الحديث يدور حولي أنا ، من هجوم لعبدالله ودفاع لي، وفي بعض الاحيان نصائح وفي بعض الاحيان تمريرات على بعضنا البعض...

لم نتطرق لشخص او قبيله ، وانت شاعر قدير وتستطيع ان تستنتج ذلك من خلال المحاورة...
ولكن ممكن اخوي محمد انه اتى بتفكيرك كما جاء في تفكير بعض الأخوان ، ان فيه مشكله بيني وبين ناصر او شونق،
وهذا الامر اصلا غير موجود في الاطلاق ، ولو بيننا شيء واجهنا بعض وجها لوجه ، ولم ننتظر من اي طرف اخر ...
وهذا اكبر الأدله ....
ولكن ربما انشغالي في الدراسه سابقا حال دون ان ابين للناس واقطع الشك باليقين....

انا ما كان ودي ابين معنى المحاورة ، لانها محاورة تلعب على معنى مدفون، وهذه سياستها ...
ولكن للضرورة أحكام ...
واطلب العذر من اخوي عبدالله السناني في هذا الأمر...

اتمنى انها وضحت الصورة اخوي محمد....

اخوي عبدالله اخوي محمد
انتو اكبر من الكلام ذا كله ، انتو اخوان وغالين
ولا يجب يكون بينكم الا كل علم غانم ....

محمد حنا شعار جميعا ولكن قبل ذلك انا وانت وعبدالله وغيرنا هنا عيال قبائل ونحسب الكلمة قبل نقولها
والله يالخوي ان العلم اللي في راسك ماحن بحوله ...

وانت اكثر واحد يعرفني ، وتعرف ان في كلمة الحق والله ما يهمني الا خالقي...
لكن قبل هذا محبة الرجال وخوتهم مبداه على كل شيء...
لانا جينا نبحث عنها ما جينا نطردها ...
صدقني يالخوي....

لبى قلوبكم تعوذوا من ابليس وكلكم عينان في راس واحد...

انا والله عن نفسي لازعلان ولا شي , هو محمد اللي زعلان ,
وجه لي كلام غير صحيح , وبس
ليش ازعل ؟

ادرس الموضوع اخوي محمد
وفكر فيه واعرف ان خويك هو خويك ما تغيره السنين...

وانا ما ابي منك الا انه يروح الشك اللي في قلبك ، ويعرفون الربع وجهة النظر وانها انزالت...
وتبقى الاخوة الصافيه النقيه بيني وبينك وبين عبدالله مثل ما كانت واحسن ...

ساترك الموضوع وساعود له لاحقا ومثل ما قلت لك فكر واحسبها وانا خوك.. وتلقى خويك هو هو...
مضطرين نطلع نقضي اشغالنا....

تحياتي للجميع والمعذره اذا اشغلناكم بالموضوع...

تسلم اخوي عبدالله..
وان شاء الله اخوي محمد بعد مافي خاطره الا الطيب ..
وانا اعرف ان المعدن الأصلي ما يصدأ مثلك ومثله وشرواكم ....


تحياتي لكم...

الاوله المعذره العذر الكبير منك يافهد وانا لك مابين قدمك وحذيك فيما اردته
كلمة والله تكفيني عن الدنيا ومافيها عبدالله يقول انه قالي والله وهو والله ماقال
والله ولاشي ولادخل في السالفه ولا اصلا تكلم معي والمعذره منك ومن عبدالله
ومن اعضاء المنتدى بالكامل والخطا وارد ولاني بمعصوم عن الخطا وانا اعترف
للجميع اني اخطيت على فهد كثير الخطا ولا اما من ناحية عبدالله فالتفاهم بيني وبينه
لانه خذا حقه وزياده وابد الي تشوفونه علي ابشروبه وانا حاضر للي تبون ومابين القدم والحذيان يافهد
والسلام اختام

محمد الشريف انت تقول اني ماقلت والله , طيب ادخل الصفحه اللي قبل وشوف هذي مشاركتي


يافهد , هذا نسي كل شي وجاء يتكلم ويسرد أكل مقلب بتفسيره , ويحسبه صايب , والشرهه , على قولة الشاعر ,
ان شرهت اشره على من تقفره * وان عتبت اعتب على الناس الكبار ,
واللي مثل محمد يجي ويحط بخويه شي كذب , فهذا والله مايهم ولا خوي اصلآ
وانا والله ثم والله اني ماعرف ناصر منهو , ولا دريت اذا كان فيه واحد اسمه ناصر
ولا ادري وش مشكلته اللي تقولون , وشنق ونق من خلال المنتدى شفت له قصائد لآ أكثر
ومدري وش صار , جايني يقول تسب خويك , منهو خويي؟ اعرف ناصر انا عشان يقول خويي
المهم , اللي يبي يزعل بدون سبب , الله لآيرده ,

وصح بدنك يافهد ولا هنت على المرور



وانت تجي بعدها تقول لاتحلف , كيف تقول ماقلت والله



وانا عن نفسي اللي ابي منك تستر ماواجهة , والله يوفقك

مداخله بسيطه لو سمحتوا
من ناحية المحاورات ومعناها فياليت ماحد يفسرها والشاعر اللي يشك أن المعنى
فيه يفتح موضوع جديد ويطلب الشاعر اللي يبيه ويتفاهم معه بدون تحليل وكلام ماله داعي

ومهما صار الأمر بسيط مزوح تجي وتروح ماتعقب جروح

وبدون مجامله الهباش والشريف والسناني من أفضل شعار المنتدى
ومايصير بينهم الكلام هذا

حياك الله يالشريف ،
ومجار وانا خوك وعذرك مقبول،
ومكانك على العين والراس،
وهذه هي الاخوة الحقيقية ، وكلنا نخطي ، ولكن تبقى علوم المرجله اللي ربونا عليها شيبانا،
هي اللي الوقود ، اللي يسيرنا لاعلى المراتب ، من قبل الشعر وغيره...
عذذرك مقبول ، وعداك العيب ،
وانت وعبدالله عينان في راس ، لاهنت وان جا منا خطا ، فاعتذر بعد ،
ويشهد الله ما يهمني قبل ذا وذاك ، اللي التشرف بخوتكم ، وتبادل علوم المرجله،
والمثل يقول : معرفة الرجال اكبر تجارة ، فمابالك لو كان توجهنا واحد ، وجمعنا امر واحد...

لاهنت يالشريف ولاهان عبدالله...
وارجوا من الاخوان اللي جو ما عاد يتعرضون السالفه الا بشحم...
انا وعبدالله ومحمد ، تفاهمنا وانتهى اللي بيننا بمزارق الطيب ، والعلوم اللي ترفع الراس...

وياليت مشرفنا الغالي يقفل الموضوع الله لا يهينه ويسلم قلبه...
واعتذر منك اخوي خالد ومن ادارتنا نيابة عن اخواني عبدالله ومحمد عما بدر منا ...
حزة شيطان وزالت ،، وانتو تعرفون قيمة أصحابكم ومكانتهم بينكم ....

واسفين ثم اسفين ثم اسفين...

مد ام الشحم يا محمد ، مد ام الشحم يا عبدالله...
حنا وكما كنا الاصحاب الأوفياء ، وما يفرقنا سوء تفاهم أو غيره....

تحياتي يالنشامى،،،