الجادل

تعديل في القصيدة واسمحونا
.
.




قلبٍ خفق من بين محني الأضلاع
وعينٍ تهل دموعها من ولعها


بغيت أعذل القلب لاشك ما طاع
وان خايلت عيني خيال تبعها


قلبٍ لها في كل الاحوال مطواع
يمشي مماشيها ويتبع سنعها


ترميه ببحورٍ طويلات ووساع
مجنون ليلى خاضها ما قطعها


ما للقدم.. والقلب.. والعين ردّاع
هامن غبابٍ نوح الاول ذرعها


ومنهن بليت بجادلٍ توجع اوجاع
بسودٍ تعالا شان ربٍ صنعها


سودٍ نظرهن يجعل القلب ينلاع
ومن ما عمل هاروت سحرٍ نشعها


لوجا نظرهن فوق صم الصفا ماع
ولو طرفهن شاهد لرضوى صدعها


يلومني من لا عرف زين الاطباع
اللي شريفات المعاني جمعها


الجادل اللي ذكرها بالملا شاع
ومنها جميع البيض بارت سلعها


لاجيتها القى لي مصيف ومرباع
وقلبي عنه هاك المواجع نزعها


ولو ضرّت الخفّاق ماهوب قطّاع
ومهما تبي ما ذكر خفوقي منعها


ولاني على ما يجرح العرض طمّاع
نفسي عن الهسّه شرفها ردعها


اللي مشى لك شبر.. قم وامش له باع
ونفس الرخيص بسومه الرخص بعها


وانا بعون الله على الكود بتّاع
واطلع جبالٍ ترهق اللي طلعها


والزين لو دونه رواصيد واسباع
لا هايبن منها ولا اخشى فزعها


وان غاب عني كل قلبي معه ضاع
ودنياي عقبه عفت باقي طمعها


لا شاري فيها ولا نيب بيَّاع
عجزت تسعني ربعةٍ من ربعها


وان هب لي من يمّه الشوق ذعذاع
الروح من بين الضماير شلعها


.........




-
#شعر
الأمير محمد الأحمد السديري ـ رحمه الله ـ


.
.