سـمّ اللقا صدفة , وأسـمّيه ميعاد

سـمّ اللقا صدفة , وأسـمّيه ميعاد

الشوق ماله عمر , يفنى وينعاد
.......له في الضلوع أن عاد وأن غاب رجفه


مع كل فرقا , له ورى الجفن ميلاد
.......وأن ماتت الفرقا لقى الشوق حتفه


جيت أقتل الفرقا من بلاد لــ بلاد
........ملّ الطريق يشيلني فوق كتفه


وأنا بعد مليت من كثر ما أرتاد
........هالشارع اللي كان لك فيه شرفه


تظمأ عيوني شوفك , وتشبع سهاد
........عيّا الزمن يقطع ظماها بــ رشفه



لاوجهك أسقاها , ولا ذاقت رقاد
......ماغير طيفك , طيفك اللي أعرفه


كنّه ظبي , وعيوني ظلال صيـاد
........يجفل قبل يرتد للجفن طرفه


مشكلته أنه كل ما أشتقت يزداد
.......حتى ملا جدران وقتي وسقفه


وأصبحت أشوفه فـ أول الغيم لاجاد
....وفـ أقصى الشفق لاطاحت الشمس خلفه


وفـي الأرض لانامت عقب صوت رعاد
.........وفي كل شباك ٍ صحت منه درفه


أتعبت طيفك لوم , واللوم مافاد
........ويوم الأمل في شوفتك مات نصفه


نويت أسافر عنك بجروح ٍ جداد
........وعمر ٍ من أوراق الزمن حان قطفه


نويت , لكن جابني الشوق منقاد
......وجابك حنينك , والزمن سال عطفه


شفتك تبـسّـم لي خجل مدري عناد
.......وفي نظرتك شوق ٍ من الظلم وصفه


حسيت كني طفل , وعيونك أعياد
........ياعيدي اللي له ورى الصدر رجفه


((سـمّ [فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]صدفة , وأسـمّيه ميعاد
.........أنا أنتظرتك , وأنت مريت صدفه))



فهد المساعد ,!

المصدر: الملتقى الجماهيري للشاعر محمد بن فطيس المري

ياوجه الله شاعر كبير فهد المساعد

لله دره لاحد ينكر هالجمال


لاهنت على هذا الانتقاء


لك تحيه يالغالي

عيوني حزينه فديتك يا غالي
وفديتك طلتك الجميله
المساعد كبير واشعاره كلها جزاله وعذوبه

منور يا غالي

صح السانك والسان من قالها

الف شكر لك يالغلا
تحيه عطره لطرحك الغاوي

لاهنت

... شاعر ...


صح الله لسان فهد جميل ماخطه

وصح الله ذوقك مميز لاهنت

تقبل مروري تحيه لك

صاحبة السمو
كم يسمو الموضوع بمرورك الكرم من هنا
واعجابك بالموضوع من دواعي سرورنا


نايف الشمري

المساعد شاعر كبير
يجبرنا على اننا نعجب في شعره ونتذوقه
لك ودي فديتك