نظرة العشق

نظرة العشق

الله واكبر ما حلى نظرة العشق
اللي تجي ما بين عاشق ومعشوق
.
نظرة غلى تشلع كما لمعة البرق
وسمومها تسطي على كل معلوق
.
بالخص لاصار النظر بينهم سرق
والعشق توه ما درى فيه مخلوق
.
تذبل غصوناً بالثرى مالها عرق
ولا نتعش قلبٍ بلا دم وعروق
.
وانتي حرقتي خافقي بالهوى حرق
شلون ابحيا وخافقي منك محروق
.
ياللي جمالك عن جميع البشر فرق
بالشكل والمبدى والاحساس والذوق
.
سر ياجنوني في خيال الهوى وارق
طالع خيال اللي يهيمون من فوق
.
طب الكواكب كلها بالسما وانق
وابعد عن اللي بين الأقدام مدقوق
.
للنادر المجمول والرايق اللبق
اللي به احساسي مشبق ومشبوق
.
ملمومة الحدين ممشوقة العنق
واللي بقى ما بين مثني ومطلوق
.
رف الخفوق لجيّته رفّة الورق
جاني وانا قبله كذا جابني شوق
.
ماشفت مثله لا شمالاً ولا شرق
مالاح بعيوني من الطرف للموق
.
نفذتلك امرين نسخ ومعه لصق
واصبحت ما بين الشرايين ملصوق
.
بالمختصر يعني كذا آخر العشق
مع احترامي لكل عاشق ومعشوق




.


شعر : فايز الخشيف


.

المصدر: الملتقى الجماهيري للشاعر محمد بن فطيس المري

صح لسان الشاعر فايز ويعطيـــــــــكـ الف عافيه على النقل الاكثر من رائع

صح لسان الشاعر وربي يعطيك العافيه وجعل روحك سالمه

شاكر لكم وممنون

لاهنت اخوي على نقل هالنص الاكثر من رائع

واحييك على اختيارك وصح لسانه وصح نقلك

اقتباس المشاركة الأصلية كتبت بواسطة عبدالله سعود المتعب لاهنت اخوي على نقل هالنص الاكثر من رائع واحييك على اختيارك وصح لسانه وصح نقلك

يا ابو سعود

صح لسان الشاعر
وسلمت يمينك
تحياتي وتقديري