إن غاب عني طول الأيام مهموم

إن غاب عني طول الأيام مهموم

.
إن غاب عني طول الأيام مهموم
....................
عبد العزيز بن محمد بن قاسم العنقري

...
..
.

العين تالي حاربتني عن النوم

ذا لي ثلاث أيام ما نيب مرتاح

والزاد ما ذوقه وأنا منْه محروم

جسمي نحل غادي كما سن مفتاح

والبال شِتّت ما بقى منه ملموم

دايم على بحر الهواجيس سبّاح

من صاحبٍ في وقتنا اليوم معدوم

ربي عطاه الزين من بد الأرواح

ما غير أعد بنايف الجال مرجوم

أشرف على اللي راح عني ولا راح

اللي خياله داخل القلب مرسوم

يطري علي في كل ممسى ومصباح

إن شفت زوله فاض ما كان مكتوم

واللي على صدري من الضيق ينزاح

وإن غاب عني طول الأيام مهموم

محدٍ بداريبي ولو صحت بصياح

أبشهد إن حبه على القلب مسموم

سمٍ يخلي بسرت القلب تنساح

من صد ما جاني من علومه علوم

غابت سنى قمراه من عقب الأوضاح

قلبي على فرقى أريش العين مصروم

شذب عروقه لين ما فيه ينباح

راع الهوى المجبور ما يلحقه لوم

لا صار في حب المزايين مشفاح

إما تجيني نظرةٍ منْه ملزوم

وإلا لحقني تالي الوقت مذباح

وصلاة ربي عن خطأ الخلق معصوم

على النبي للدين مبدأ وميضاح


.

المصدر: الملتقى الجماهيري للشاعر محمد بن فطيس المري