سعيد القحطاني+ قاصد كريم ثالث طواريق الامسيه ,

سعيد

ياسلام على الحضار والليل بادي
تحت ذا*الكوكب اللي يفلج الليل نوره

اضبط اللعب ياقاصد وخل الدوادي
جابك الله ترا ذا الليل مافيه كوره

قاصد
مرحبا ياسعيد وكني اليوم غادي*
شفت بالحلم مقطعها بصوتٍ وصوره*

ان بغيت الحوية وان بغيت الشدادي*
مير كلن يناطح عن ذلوله وكوره

سعيد
سم بالله تراها ضحك والوضع عادي
لاتصدق ترا ماعاد مني خطوره

بس ودي أسالك حاجة في فوادي
وعطني الصدق والدعوى تراها مشوره

قاصد
والله انك عزيز وفيه ملحٍ وزادي
بس انا خايف ان ابليس يعطيك دوره

احذرك الف مره ومرةٍ للمعادي
من يلوم الصديق اللي يخاف الخطوره *

سعيد
انت جاوب وسؤالي وانت تعرف مرادي
كيف ضاع الخبر والناس ثارو بثوره

وبارك الله برجل من خطاه استفادي
والاجابه ترا ماهي عليك ب ضروره

قاصد

يعلم الغيب من يعلم خفايا العبادي*
التزمت الحياد ولا تكشّفت عوره*

يامدور حقيقتها بعلمٍ وكادي*
انشد اللي يقشون الزبيدي بجذوره


سعيد

العرب مابقا الا يقدحون الزنادي
وانت باقي تقول ان الدروج محضوره

اشهد انك شمالي ماتجيب المنادي
فار دمي ودمك جامد في قدوره*

قاصد


يالله انك تسمح لي دروب الرشادي
قمحنا في سبلنا ماذرينا قشوره*

ماتتبعت اثر ذيبٍ يحوف البلادي
دام ضاني بخير الله يكافي شروره

سعيد
كيف هالذئب ماتوه ذيابن عوادي
قد تعشى عشاه وخوفتي من فطوره
الله انه يخارج من نويا العبادي
الخفا والمخفا تضهره من جحوره

قاصد

دام يقطعك من نقل الصميل البرادي
مااحتسبت القوايل واشتداد الحروره*

ماادري اللي قصدته كبر ولا عنادي*
شاعرٍ يخفي عناده وضح لي غروره

سعيد
لاتواصل على درب الخطأ بالتمادي
انت نفسك على كثر الخطيا جسوره
خل عينك على ذاك الجليس المقادي
لا تطب البحر والا تحاول عبوره
قاصد

قلتلك ياعميل الخير وضعي حيادي
ماتوددت ابو نوره على شان نوره
مير لاتنشر البيضا يبين السوادي
بين هذا وهذا غلطةٍ وامخبوره


سعيد
مانت ماسول من. حادث ديانا وفادي
كلمة الحق قلها والعلوم مخبوره
لا تعقل الجمل بين النمل والقرادي
ماقربت المخبأ لين صلع سفوره

*
قاصد
سيلنا ياسعيد يضيق به كل وادي*
لاتحدر من العالي يهدّم جسوره*

مصلحة شرع تلزمنا بحرب الفسادي*
ومودع السر معنا فرحته ياسروره


سعيد
لا انتحا السيل سال وضيعته الريادي
ولا علي خوف من رعى الرماد وذروره
ماتبيني احبسك واحجزك بنفرادي
الحقيقه ب حايل وانت بقصا شروره

قاصد


الحقيقه معاي نصابها بالايادي*
لاتحقق بشيٍ ماتملكت اموره*

كان قرنك متين وفيك فزعة مفادي
شوف قصري منيف وروح وانطح بسوره
سعيد

لا ولا ماهدى جوك ولاهوب هادي
الله الله على قاصد كريم وقصوره
مادرى اني خبير وبالمهمه قيادي
اضهر العلم من بطنه ولو في مصوره*

قاصد

عنك يالشاعر اللي في نهار العيادي*
لو يعيد علينا مانصدق شعوره

كيف تبحث خفاي وكيف تلحق مرادي
وانت تقرا الكتاب ومنت فاهم سطوره


سعيد

الحقيقه معي والحق شربي وزادي
ياصديقن طلع بك تالي الوقت بوره
لاتناور ترا زرعك كلاه الجرادي
بعدما نت بصريح وفيك نفسن غيوره

قاصد
ياتعاسة حظوظ اللي توقف قصادي*
لعبهم يوم خافوا مثل لعب البزوره*

الحصيني دخيل الله يحب الحمادي*
كل ماجيت اصيده مار بالذيل موره
سعيد

انت هديت طيرك مع طيور الهدادي
تحسب انه يوالف للحماد وطيوره
وجاه طيرن يمكن ضربته بالثنادي
اصفر العين من هقوتك تقصر شبوره


قاصد

الطيور وتهاجر يم دار البرادي*
وانت تبقى وانا ابقى كان بالراس فوره*

طول عمرك تذاكر مير مامن مفادي*
التحق ترم صيفي في نهاية شهوره*

سعيد

انتهت بالكلام الذرب مسك وزبادي
ياشذا الورد والريحان فاحة عطوره
حقك العود الأزرق ياكربم الأيادي
وكل شخصن على رأيه وشوره بزوره

قاصد

الختام وختمنا ريح مسكٍ وكادي*
واشكر الشاعر العملاق شرف حضوره

انتهت ملعبتنا مصافحٍ بالايادي
واشكر اللي حضرها شكر يعجز حصوره